ELORDADA – ELBASY KÝBOGY

Búgin Astanada grek-rım kúresinen Qazaqstan Respýblıkasy Prezıdentiniń kýbogy jolyndaǵy halyqaralyq týrnır bastalady. Deńgeıi jaǵynan basqa da iri halyqaralyq básekelerden kem túspeıtin bul jarysqa bıyl 8 eldiń quramalary qatysatyn bolady. Týrnırge qurmetti qonaq retinde FILA prezıdenti Rafael Martınettı (Shveısarııa), Olımpıadanyń úsh dúrkin chempıony Aleksandr Karelın (Reseı), Olımpıada chempıondary Mıhaıl Mamıashvılı (Reseı) men Chaba Hegedýsh (Vengrııa) shaqyrylyp otyr. FILA bıýrosynyń múshesi, “Samuryq-Qazyna-Asta­na” korporatıvti qorynyń bas dırektory Dáýlet Turlyhanovtyń aıtýynsha, elorda tórinde tóselgen kilemde Qazaqstannyń úzdik balýandary namysty qoldan bermeýge bar kúshterin salady. Bul báseke ulttyq qurama úshin aldaǵy kezde Máskeýde ótetin álem chempıonaty men Qytaıda jalaýyn kóteretin jazǵy Azııa oıyndaryna daıyndyq retinde ótkiziledi. Astanada osy kúnderi taǵy bir Elbasy kýbogy jolyn­daǵy týrnır ótýde. Karateniń shınkıo­ký­shınkaı túrinen ótip jatqan dodaǵa Qazaqstan, Grýzııa, Japonııa, Qyrǵyzstan, О́zbekstan men Reseıdiń 150-den astam sportshylary qatysýda. Al 6-11 shilde kúnderi Almatyda voleıboldan Qazaqstan Prezıdentiniń kýbogy jolyndaǵy dás­túr­li halyqaralyq týrnır ótedi. Atalmysh dodaǵa erler arasynda 6 komanda, áıelder arasynda 4 komanda qatysady. Halyqaralyq voleıbol federasııasynyń resmı do­da­sy bolyp bekitilgen týrnırde erler arasynda Qa­zaq­­stan ulttyq quramasy, onyń ekinshi komandasy, Tý­nıs, Aljır quramalary men Reseıdiń “Lokomotıv – Izý­­mrýd” klýby kúsh synasady. Al áıelder báseke­si­­ne Qazaqstan, Aljır, Ýkraına qura­malary men “Djıa­n­gsý” komandasy qatysyp, jarys kórigin qyzdyrady. * * * KIMNIŃ BAǴY JANAR EKEN? Beısenbi kúni Astanada Boks federa­sııasynyń uıymdastyrýymen sporttyń osy túrinen ótip jatqan Elbasy N.Nazar­baevtyń kýbogy jolyndaǵy halyqaralyq týrnırde aqtyq synǵa joldama beretin shıelenisti jekpe-jekter ótti. Onda jartylaı fınalǵa shyqqan Qazaqstannyń 24 boksshysy arasynan 11 bylǵary qolǵap ıesi fınalǵa joldama aldy. Osylardyń ishinde óz salmaq dáreje­lerinde Birjan Jaqyp (48 kg.), reseılik Ǵaıyrbek Germahanovty jeńgen Mıras Jaqypov (51 kg.), Aıdar Ámirzaqov (60 kg.), Serik Sápıev (69 kg.), Danabek Sý­janov (75 kg.), Azamat Belgibaev (81 kg.) sııaqty boks­shylardyń jaqsy óner kórsetkenin atap ótkenimiz jón. Sonymen birge jartylaı fınalǵa deıin súrinbeı jetip Ýkraınanyń Olımpıada chempıony Vasılıı Loma­chen­ko­dan utylǵan Samat Báshenov (60 kg.) pen Dáýren Eleýsinov (75 kg.) jas bolsa da qarsylastaryna laıyq­ty qarsylyq kórsete alǵanyn aıtýǵa bolady. Al Serik Sápıev pen Azamat Belgibaevtyń jeńisi jarty jyldaı ishte júrgen kúıinishti tarqatqan jeńisi boldy. Bul eki boksshy qańtar aıynda Astanada ótken Qazaq­stan chempıonatynda Rústem Sybaev pen Almat Se­rimov­ten jeńilis tapqan bolatyn. Osy jolǵy jekpe-jekterde olar jankúıerler aldynda sol kezde ketken eseni qaıtardy desek bolady. Munda Seriktiń jeńisin erekshe atap ótkenimiz jón. Rústemmen bolǵan jekpe-jek­te ol kezdesý bastalmaı jatyp qarsylasyna lap qoı­dy. Sóıtip, eki raýnd boıy Sybaevtyń basyn kó­tert­kizbeı, sabap tastady. Osy kezde Sybaevtyń bapkeri oramaldy sharshy alańǵa laqtyryp, tóreshiden kezdesýdi toqtatýdy ótindi. Esep – 14:1. Sápıevtiń paıdasynda. Endi atalmysh týrnırdiń aqtyq synynda Serik Sápıev reseılik Aleksandr Klınkovpen, Azamat Belgi­baev kýbalyq Irosbanıs Dıývergel Avılıspen kez­des­­se, basqa salmaqtarda jeńgen Ivan Dychko (91 kg.-den joǵary) sırııalyq Soýmar Hýssýnmen, Mereı Aqshalov (64 kg.) reseılik Aleksandr Bespýtınmen, Aıdar Ámir­zaqov (60 kg.) Vasılıı Lomachenkomen aıqa­sady. Sol sııaqty óz salmaq dárejelerinde fınalǵa shyqqan taǵy 6 boksshymyz ózge eldiń ókilderimen kúsh synasady. Dastan KENJALIN.