Memleket basshysy Qasym-Jomart Toqaevtyń bıylǵy Joldaýynda elimizdiń saıası-ekonomıkalyq damý baǵyty aıqyndaldy. Onyń basty eki arqaýy bar: biri – ınvestısııany óndiris salasyna tartý, ekinshisi – tranzıttik-logıstıkalyq áleýetti tıimdi paıdalaný. Sońǵysy – qazirgi kezeńde aıryqsha ózekti.
Joldaýda kólik-logıstıka júıesin damytýdyń mańyzy atalyp ótti. Prezıdenttiń aıtýynsha, ótken jyly elimizdiń aýmaǵy arqyly júk tasymalynyń kólemi 1 mlrd tonnadan asty. Bul – Qazaqstannyń tranzıttik áleýetin aıqyn kórsetetin kórsetkish.
Memleket basshysy Transkaspıı halyqaralyq kólik baǵytyn damytýdyń qajettigin atap ótti. Sonymen qatar jańa ınvestısııalar tartylyp, ınfraqurylym jaqsaryp, sapaly jumys oryndary ashylýy qajet. Prezıdent óńirlerdiń kólik baılanysyn nyǵaıtýǵa, elimizdiń iri tranzıttik aımaq retindegi múmkindikterin tolyq paıdalanýǵa erekshe mán berdi.
Álemdik naryqqa shyǵý máselesinde de naqty mysaldar keltirildi. Máselen, jýyrda Qytaıdyń Lıanıýngan porty arqyly qazaqstandyq bıdaı Vetnamǵa jóneltildi. Sondaı-aq Aýǵanstan aýmaǵyndaǵy «Týrgýndı – Gerat» temirjolyn salý arqyly Pákistan naryǵyna shyǵý kózdelip otyr. Al «Shyǵys – Batys» baǵyty boıynsha uzyndyǵy 836 shaqyrym bolatyn «Dostyq – Moıynty» temirjolynyń ekinshi jelisi iske qosylmaq. Bul – qarqyndy ilgerileýdiń aıqyn dáleli.
Úkimet tarapynan «Baqty – Aıagóz», «Qyzyljar – Moıynty» jobalaryn jedeldetip qolǵa alý jospary jarııalandy. Bul sharalar elimizdegi temirjol júıesiniń tolyqqandy qańqasyn qalyptastyrýǵa múmkindik beredi. Alaıda kólik salasynda ozyq elder qataryna qosylý úshin sıfrlandyrý men jasandy ıntellektini keńinen qoldaný qajettigi de basa aıtyldy.
Joldaýda áleýmettik-ekonomıkalyq máselelermen qatar, saıası reformalardyń jalǵasyn tabatynyna nazar aýdaryldy. Atap aıtqanda, 2027 jyldan bastap Qazaqstan bir palataly Parlamentke kóshpek. Bul – Konstıtýsııalyq aýqymdaǵy ózgeris. Endigi jerde aımaqtyq múddeler men etnosaralyq qarym-qatynastardy retteý, azamattyq qoǵamnyń pikirin bildirý jáne zań shyǵarý úderisi Májiliste shoǵyrlanady.
Prezıdenttiń aıtýynsha, azamattardyń quqyqtary men múddeleri eń joǵary qundylyq retinde qaralady. Barlyq sheshim, pikirtalas pen saıası talqy Májilistiń alańynda órbimek. Bul – eldiń demokratııalyq damýy jolyndaǵy úlken jaýapkershiliktiń belgisi. Joldaýda kóterilgen bastamalar qoǵam úshin mańyzdy ári ýaqyt talabyna saı.
Maqsat JAQAÝ,
saıasattanýshy