M. Kataev atyndaǵy Oqýshylar saraıynyń «Antares» klýbynyń jas izdenýshileri ózderiniń qyzyǵýshylyǵyn bolashaq mamandyǵyna aınaldyryp keledi, dep jazady Egemen.kz.
Tehnıkalyq shyǵarmashylyq pen zertteý jumystary – mamandyqqa aparar dańǵyl jol. «Antares» klýbynyń túlekteri tehnıkalyq shyǵarmashylyq pen zertteýshilik qyzmet kásibı baǵyt tańdaýdyń shynaıy jolyna aınalatynyn aıqyn dáleldep júr.
HHI ǵasyrdyń oqýshysy – tehnologııalar men san túrli kásiptiń ortasynda ómir súredi. Qosymsha bilim berý pedagogynyń basty mindeti – balanyń ózin-ózi tájirıbe arqyly tabýyna kómektesý.
«Antareste» balalar ártúrli róldi baıqap kóredi: konstrýktor, zertteýshi, ınjener, astronom. Oqýshy qural qurastyryp, zymyrannyń maketin jasap, teleskoppen jumys istegende ol tek bilim alyp qana qoımaı, shynaıy ashylymnyń dámin tatady.
Zertteý jumysy ǵylymı oılaýdy damytady: suraq qoıýǵa, boljam jasaýǵa, ony baqylaý men tájirıbeler arqyly dáleldeýge úıretedi. Klýbta balalar Aıdy, Iýpıterdi, Satýrndy baqylaıdy, Venera fazalaryn tirkeıdi. О́zderin naǵyz zertteýshideı sezinedi.
Mysaly, klýb túlegi Sádýev Alııar juldyzdarǵa qyzyǵýshylyqtan bastalyp, Aı fazalarynyń jeke kúntizbesin jasady. Onyń eńbegi basqa balalarǵa baqylaýlardy josparlaýǵa kómektesti, al ózi astronomııamen baılanysty mamandyq jaıly oılanýǵa yntalandy.
Taǵy bir qatysýshy Dýhtýrbaev Elhan shaǵyn zymyran ushyrýǵa arnalǵan qondyrǵy úlgisin jasap shyqty. Ol úshin fızıka zańdaryn tájirıbe júzinde tekserý mańyzdy boldy. Qazir ol tehnıkalyq baıqaýlarǵa belsene qatysyp, ınjenerlik baǵytqa senimdi qadam jasap keledi.
Kım Danııl baǵdarlamalaýǵa qyzyǵyp, baqylaý nátıjelerin óńdeýge arnalǵan kompıýterlik baǵdarlama jasady. Bul tájirıbe oǵan IT jáne baǵdarlamalaý – bolashaq mamandyǵy bola alatynyn uǵyndyrdy.
Halyqaralyq jetistikter de bar. Máselen, Ibraev Mıralı qatań irikteýden ótip, jazda Nıderlandtaǵy zertteý mıssııasyna qatysyp, Qazaqstandy halyqaralyq deńgeıde tanytty.
«Antares» túlekteriniń kóbi tehnıkalyq jáne jaratylystaný baǵyttarynda bilimin jalǵastyryp, olımpıadalarǵa, baıqaýlar men konferensııalarǵa qatysady. Keıbiri ınjenerııa, fızıka, ǵarysh salasyndaǵy alǵashqy kásibı qadamdaryn jasap úlgerdi.