AQTО́BE. 23 maýsym. Aqtóbede Qazaqstannyń Tuńǵysh Prezıdenti Nursultan Nazarbaev atyndaǵy ortalyq mádenıet jáne demalys saıabaǵynda Sh.Qaldaıaqov atyndaǵy «Meniń Qazaqstanym» halyqaralyq án festıvaliniń oblystyq irikteý kezeńi jáne jeńimpazdarynyń gala-konserti ótti. Bul týraly egemen.kz tilshisi habarlady.
Festıval shymyldyǵy halyqaralyq baıqaýlardyń laýreaty Allabergen Jaqsybaevtyń oryndaýynda Qazaqstan Kompozıtorlar odaǵynyń múshesi Beıbit Oralulynyń «Aqtóbe» ánimen ashyldy. Sharanyń qurmetti qonaqtary jáne qazylar alqasynyń músheleri Premer-Mınıstr orynbasarynyń keńesshisi Nurbolat Ahmetjanov, Mádenıet jáne sport mınıstrligi mádenıet komıtetiniń bas sarapshysy Qýanyshbek Muhanǵalıev jáne oblysqa tanymal mádenıet jáne óner qaıratkerleri boldy.
О́ńirde osy baıqaýǵa qatysýshylardyń sany jyldan-jylǵa artyp keledi. Festıvaldiń oblystyq irikteý kezeńine 15 ónerpaz qatysyp, ózderiniń talanttaryn kórsete bildi. Án baıqaýy barysynda kompozıtor Shámshi Qaldaıaqovtyń tanymal jáne el súıip tyńdaıtyn ánderi shyrqaldy. «Júzden júırik» shyqqan aqtóbelik ánshi Jánibek Baıbosynov kúzde Astanada ótetin Sh.Qaldaıaqov atyndaǵy «Meniń Qazaqstanym» halyqaralyq án festıvaline joldama aldy. Ol onda oblys namysyn qorǵaıtyn bolady.
Satybaldy Sáýirbaı.
Derek, sýret: egemen.kz.