Memleket basshysy Qasym-Jomart Toqaevtyń Qazaqstan halqyna arnaǵan «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Joldaýy – elimizdiń damýyna aıqyn baǵdar beretin strategııalyq qujat. Joldaýda aıtylǵan árbir tujyrym Ulttyq ulannyń kúndelikti qyzmetimen jáne azamattyq qoǵamnyń suranysymen úndesedi.
Prezıdent atap ótkendeı, «Zań jáne tártip» – memleketimizdiń myzǵymas tuǵyry. Bul qaǵıdany berik ustaný – ulttyq qaýipsizdikti nyǵaıtý men el ishinde turaqtylyqty saqtaýdyń basty alǵysharty. Qoǵamda quqyqbuzýshylyqqa tózbeýshilik mádenıetin qalyptastyrý – barsha memlekettik organnyń jáne árbir azamattyń ortaq mindeti. Osy baǵytta Ulttyq ulan jaýyngerleri kún saıyn tártipti qamtamasyz etý, quqyqbuzýshylyqtyń aldyn alý, azamattardyń tynyshtyǵy men qaýipsizdigin qorǵaý isinde tabandy qyzmet atqaryp keledi. Prezıdenttiń bul saladaǵy bastamalaryn tolyq qoldaımyz jáne ony júzege asyrýǵa bar kúshimizdi salamyz.
Joldaýdaǵy qoǵamdyq oryndardaǵy dórekilik pen tártipsizdikke qarsy turý qajettigi jónindegi oı da óte oryndy. О́rkenıetti qoǵamnyń negizi – mádenıet pen ádep. Áskerı qyzmetshi úshin de sypaıylyq pen tártipti saqtaý – basty qasıetterdiń biri. Sondyqtan Ulttyq ulan áskerıleri qoǵamdyq tynyshtyqty kúzetýmen qatar, qoǵamda syılastyq pen qurmet mádenıetiniń ornyǵýyna úles qosa beredi.
Memleket basshysy el birligin nyǵaıtýǵa erekshe toqtaldy. «Árbir azamat memleketshil, otanshyl bolýy kerek», degen sózi kásibı paryzymyzben tolyq úndesedi. Ulttyq ulan sarbazdary úshin Otanǵa adal qyzmet etý, egemendikti qorǵaý, jer tutastyǵyn saqtaý – qasıetti borysh. Halqymyz tatýlyqty saqtap, birligin arttyrǵan jaǵdaıda ǵana kez kelgen qıyndyqty eńserip, alǵa nyq qadam jasaı alamyz.
Prezıdent jastardyń jańa urpaǵyna úlken senim artyp otyr. Joldaýda aıtylǵandaı, qazirgi jas býyn úshin patrıotızmniń basty kórinisi – jasampazdyq pen jańashyldyq. Bul – ýaqyt talabyna saı qubylys. Jastar ǵylym-bilimge umtylyp, zamanaýı tehnologııalardy meńgerip, jasandy ıntellektini ıgerý arqyly elimizdi órkenıetti elder qataryna qosýǵa talpynyp jatyr. Ulttyq ulan qataryndaǵy jas sarbazdar da osy umtylysty óz boıyna sińirip, el damýyna óz úlesin qosýǵa daıyn.
Memleket basshysy silteme jasaǵan hakim Abaıdyń «Adamnyń adamshylyǵy aqyl, ǵylym, jaqsy ata, jaqsy ana, jaqsy qurby, jaqsy ustazdan bolady» degen sózi árbir azamat úshin ómirlik ustanym dep bilemiz. Ol bul oıdy jalǵastyryp, órkenıetti eldiń basty ereksheligi – ádil zań, bilikti bılik, sanaly ári belsendi azamat ekenin atap kórsetti. Bul qaǵıdattar – quqyqtyq tártip áskerı qyzmetiniń de negizi. Árbir áskerı qyzmetshi ádildikke, tártipke, elge adaldyqpen qyzmet etýge ant bergen.
Joldaýda kóterilgen taǵy bir mańyzdy másele – memleket deńgeıinde qabyldanǵan sheshimder halyqtyń turmysyn jaqsartýǵa, ekonomıkany turaqtandyrýǵa, áleýmettik ádilettilikti ornyqtyrýǵa baǵyttalýǵa tıis ekeni. Bul – eldiń jańa turpatty, qýatty memleketke aınalýynyń basty joly. Ulttyq ulan óz kezeginde ishki turaqtylyqty nyǵaıtýǵa jáne qoǵamdyq qaýipsizdikti qamtamasyz etýge úles qosyp, osy úlken maqsatqa qyzmet etedi.
Elimiz búginde jan-jaqty, túbegeıli reformalardyń arqasynda damýdyń jańa kezeńine qadam basty. Alda aýqymdy mindet tur. Baǵdarymyzdan aınymaı, alǵa qaraı nyq qadam bassaq qana myqty memleket bolamyz. Prezıdenttiń strategııalyq bastamalaryn júzege asyrýda Ulttyq ulan áskerı qyzmetshileri árqashan aldyńǵy sapta bolyp, halyq pen memleketke adal qyzmet etedi.
Talapker ÁMIREEV,
general-maıor, Qazaqstan Respýblıkasy Ulttyq ulan «Ońtústik» óńirlik qolbasshylyǵynyń qolbasshysy