Shyǵys Qazaqstan oblysy Polısııa departamentiniń Kıberqylmysqa qarsy is-qımyl basqarmasy qyzmetkerleri 18 jastaǵy azamatty ustady. Ol messendjer qoldanýshylarynyń akkaýnttaryn buzdy degen kúdikke ilindi, dep habarlaıdy Egemen.kz.
Tergeý derekterine sáıkes, kúdikti áleýmettik jelilerdegi tikeleı efırlerdi baqylap otyrǵan. Efırde keıbir qatysýshylar ózderiniń uıaly telefon nómirlerin nemese telefon ekrandaryn kórsetken. Sol sátte ekranǵa túsken messendjerge kirýdi rastaý SMS-kodtaryn paıdalanyp, ol jábirlenýshilerdiń paraqshalaryna qol jetkizgen.
Bóten akkaýnttarǵa kirgen soń, ol jábirlenýshilerdiń jaqyn tanystaryna aqsha qaryzǵa berý jóninde jalǵan habarlamalar taratqan. Al túsken qarajatty óz shottaryna aýdarǵan.
Alaıaqtyq áreketterdiń saldarynan oblystyń bes turǵyny zardap shekti. Qazirgi ýaqytta bul derek boıynsha «Alaıaqtyq» babymen qylmystyq is qozǵaldy. Sotqa deıingi tergeý júrgizilýde. Sondaı-aq polısııa qyzmetkerleri kúdiktiniń osyǵan uqsas basqa da quqyqbuzýshylyqtarǵa qatystylyǵyn tekserip jatyr.
Shyǵys Qazaqstan oblysynyń Polısııa departamenti azamattardy onlaın-translıasııalar kezinde saq bolýǵa shaqyrady.
Jeke derekterińizdi JSN, bank kartasynyń nómirin, mekenjaıyńyzdy, telefon nómirińizdi jáne ózge de qupııa aqparatty eshqashan tikeleı efırde jarııa etpeńiz.
Eger siz ınternettegi zańsyz áreketterdiń qurbany nemese kýási bolsańyz, birden 102 nómirine habarlasyńyz nemese jaqyn mańdaǵy polısııa bólimine júginińiz.
О́skemen