О́skemende tatar halqynyń belgili aqyny, Keńes Odaǵynyń Batyry Musa Jáleldiń eskertkishi ashyldy.
Tarıhtan belgili, Musa Jálel 1942 jyly aýyr jaralanyp, tutqynǵa túsedi. Konslagerde jasyryn top quryp, keńestik tutqyn-jaýyngerlerdiń lagerden qashýyn uıymdastyrady. Onyń jazǵan óleń-jyrlary tutqyndaǵy serikteriniń arasynda keńinen taralady. Ol qupııa uıym qurýǵa qatysqany úshin Pletsenzee áskerı túrmesinde ólim jazasyna kesilgen.
Oblys ortalyǵynyń Protozanov pen Qaısenov kósheleriniń qıylysynda boı kótergen eskertkishtiń ashylý saltanatyna Tatarstan Respýblıkasynyń mádenıet mınıstri Aırat Sıbaǵatýllın bastaǵan meımandar keldi. Delegasııa quramynda «Tatarstan – jańa ǵasyr» telearnasynyń túsirilim toby da bar. Sondaı-aq, sharaǵa elimizdiń Parlament Májilisiniń depýtaty Svetlana Ferho, oblys ákiminiń orynbasary Jaqsylyq Omar, О́skemen qalasynyń ákimi Temirbek Qasymjanov, oblystyq tatar etnomádenı birlestiginiń jetekshisi Ǵabdýlhaı Ishmuratov jáne óńirdegi tatar etnosynyń ókilderi qatysty.
– Eskertkish qysqa merzimde turǵyzyldy. Oǵan qaladaǵy barlyq etnomádenı birlestikter, kásipkerler men qalanyń qarapaıym turǵyndary atsalysty. Olardyń barlyǵyna alǵys aıtamyz. Bul – bizdiń elimizdiń birligi men dostyǵynyń aınasy. Biz birge bolǵanda barlyq ıgilikke qol jetkizemiz! – dedi shahar basshysy Temirbek Qasymjanov.
Eskertkishtiń ashylý rásiminde Uly Otan soǵysynyń erjúrek batyry týraly syr shertilip, jaýyngerdiń jalyndy jyrlary oqyldy. Aqynnyń ózi de jyr joldarynda «О́limnen keıingi ǵumyr jalǵastyǵy úshin de ómir súrý qajet» ekenin aıtyp ketti emes pe?! Uly Jeńistiń 70 jyldyq mereıtoıy aıasynda boı kótergen eskertkish tatar aqynynyń esimi áli el esinde ekenin ańdatty.
Atalǵan shara etnoaýylda tatar halqynyń ulttyq Sabantoı merekesimen jalǵasty.
Dýman ANASh,
«Egemen Qazaqstan».
О́SKEMEN.