ASTANA. 8 mamyr. «Progress M-27» ǵarysh kemesi Máskeý ýaqyty boıynsha juma kúni 05:04-te jumysyn toqtatty. Bul týraly «Roskosmos» taratqan resmı málimdemege silteme jasap, interfax.ru habarlady.
Reseılik «Progress M-27» ǵarysh kemesi jumaǵa qaraǵan túni atmosferanyń tyǵyz qabatynda janyp ketken. Apat Tynyq muhıtynyń ústinde tirkelgen. «Ǵarysh keńistigin baqylaý ulttyq júıesi taratqan derekterge qaraǵanda, keme aýa qabatynyń tyǵyz qabatyna kirip, janyp ketken», – deıdi «Roskosmos» ókili.
Qazirgi tańda «Progress M-27»-niń oqystan joıylyp ketýine baılanysty tergeý jumystary júrgizilýde. Tergeý qorytyndylary memlekettik komıssııa jumysy aıaqtalysymen 13 mamyrdan keshiktirilmeı jarııalanatyn bolady.
Aldyn ala derekter boıynsha, kemeniń isten shyǵýyna «Soıýz» tasyǵysh-zymyranynyń úshinshi satysyndaǵy jarylys túrtki bolǵan. Satydaǵy apat odan «júk kóligi» bólinetin kezden bes-alty sekýnd buryn bolǵan.
Osydan keıin ǵarysh kemesi tıisti shamadan artyq jyldamdyqta aınala bastaǵan. Qatty aınalýdyń saldarynan «Progresstiń» basqarý júıesi isten shyqqan.
Esterińizge sala keteıik, «Progress» ǵarysh kemesi 28 sáýir kúni Baıqońyrdan ushyrylǵan bolatyn. Keme halyqaralyq ǵarysh stansasyna janarmaı, ottegi, ǵylymı saraptamalar úshin qurylǵylar, ǵaryshkerlerge sálemdemeler, sondaı-aq, azyq-túlik jetkizýi kerek bolǵan. Ǵarysh kemesiniń isten shyǵý shyǵyny bes mıllıard rýblge baǵalanyp otyr.
Elaman Qońyr.
Derek, sýret: interfax.ru.