Ońtústik Qazaqstan oblysynda úsh kún qatarynan ótken Atyraý oblysynyń mádenıet kúnderiniń shymyldyǵy «Túrkistan» saltanat saraıynda jabyldy. Jabyldy dep Aqjaıyqtan kelgen aǵaıynnyń Atyraýǵa oralatyndyǵyna ǵana qatysty aıtyp jatyrmyz, áıtpese barmasań, kelmeseń jat bolatyn zamanda az kún ishinde bir úıdiń balasyndaı etene jaqyn bolyp úlgergen júzdesýlerdiń taǵylymyn eki jaq ta umyta qoımas. Belgili jazýshy Raqymjan Otarbaevpen ótken oqyrmandar kezdesýlerinen osyny uqtyq.
«Túrkistandaǵy» Gala-konsert Dına Nurpeıisova atyndaǵy akademııalyq ult-aspaptar orkestriniń kúıimen ashyldy.
– О́zderińiz biletindeı, 2013 jyly Elbasy óńirler arasyndaǵy qarym-qatynasty nyǵaıtý úshin aptalyqtar ótkizýdi tapsyrǵan bolatyn, – dedi oblys ákimi Asqar Myrzahmetov. – Osyǵan oraı, ótken jyly bizdiń óńirge Jambyl, Mańǵystaý oblysynyń ónerpazdary gastroldik saparmen keldi. Mádenı onkúndikter barlyq aımaqta ótýde. Úsh kún qatarynan kóterińki kóńil kúı syılaǵan atyraýlyq ónerpazdar da tek Shymkent qalasymen shektelmeı, aýdan sahnalarynda óner kórsetti. Mádenı kúnder aıasynda ólkeniń rýhanııatyn ǵana emes, jalpy, tynysyn sezgendeı boldyq. Tarıhy tereń, mádenıeti aýqymdy Atyraýdan kelgen óner ókilderine ońtústik halqy atynan alǵys aıtamyn. Osylaı degen Asqar Isabekuly Atyraý oblysy ákiminiń orynbasary, delegasııa jetekshisi Shyńǵys Muqanǵa «Taý samaly» oqý-saýyqtyrý ortalyǵyna 100 orynǵa joldama men Alǵys hat tabys etti.
Atyraý oblysy ákiminiń orynbasary Shyńǵys Muqan – ońtústikqazaqstandyqtarǵa bóten emes, óz baýyrynda ósken bir balasy. Belgili jýrnalıst Jumabek Muqanovtyń uly Shyńǵystyń ońtústikke at izin salmaǵanyna biraz ýaqyt bolǵan eken.
– Az ǵana ýaqyttyń ishinde Shymkent adam tanymastaı ajarlanyp ketipti, – dedi ol. – Bul, birinshiden Elbasynyń óńirlerge salǵan ınvestısııasynyń jemisi bolsa, ekinshiden bardy uqsatyp ońtústik jurtynyń tórt qubylasyn túgendeıtindeı jemisti jumystar atqarǵan oblys basshysynyń eńbegi.
Az otyryp kóp synaıtyn qonaq aıtqan lebiz keń saraıǵa ıne shanshar oryn qaldyrmaǵan jurtqa jaǵymdy áser etti.
Shyńǵys Muqan eki oblys arasyndaǵy mádenı baılanystyń kádesi retinde oblys basshysy Asqar Isabekulyna Atyraý án-kúı murasynyń 12 dıskiden turatyn elektrondy jınaǵyn, on tomdyq poezııa antologııasyn, ór aqyn M.О́temisulynyń beınesi beınelengen tósbelgi jáne dombyra boıtumardy syıǵa tartty.
Keń tynysty konserttik baǵdarlama kórermenderdiń kóńilinen shyqty. Dına Nurpeıisova atyndaǵy akademııalyq ult-aspaptar orkestri, aspandaǵy aqqýǵa án qosqan Gúlmaıdan Súndetova, Venera Mashqalıeva, Áset Álı bastaǵan ánshilerdiń óneri, órshil jigitter bı tobynyń tamyrlardy búlkildetip qan qyzdyrýy, «Adaıdan» «Mahambetke» ulasqan kúı kúmbiri tyńdarmandardyń janyn baýrady.
Baqtııar TAIJAN,
«Egemen Qazaqstan».
ShYMKENT.