«Qısaıǵandy túzetseń, jylaǵandy ýatsań, Táńiriniń úıi Báıtolla qarsy aldyńnan keledi» dep jyrlaǵan babalarymyz kisi kóńilin kóterý Qaǵbany kóterýmen, al ony qıratý Qaǵbany qıratýmen teń ekenin aıtyp ketken. Pavlodardaǵy qarttar úıinde turatyn 94 jastaǵy Saǵadat Jumabaev aqsaqal da qajylyqqa barý úshin ómir boıy aqsha jınaǵan eken. Biraq sońǵy sátte syrqat bala tárbıelep otyrǵan analarǵa shapaǵat etip, qarajatyn 30 áıelge bólip bergen, dep jazady Egemen.kz.
Bıyl shilde aıynda qolyndaǵy 3,6 mln teńgesin 30 anaǵa teń bólgen kezde áıelderdiń árqaısysyna 120 myń teńgeden kelgen. «Qajylyqqa barsam» degen armanynyń ornyna syrqat balasy bar analarǵa kómek bergen qarııanyń bul izgi áreketi kóptiń júregin eljiretip, kózine jas aldyrdy.
Qarııanyń qaıyrymdy áreketi týraly estigen Bas múftı Naýryzbaı qajy Taǵanuly demeýshilerdiń kómegimen qasıetti qajylyq saparyna joldama syılaǵan eken.
«Umra saparyna attanar aldynda Saǵadat Jumabaev Bas múftıge aq batasyn berip, shynaıy rızashylyǵyn bildirdi. Bas múftı dástúr jolymen aqsaqaldyń ıyǵyna shapan japty. 94 jastaǵy qarııanyń qasıetti sapary ońynan bolǵaı», dep habarlaıdy Múftııattyń baspasóz qyzmeti.