Ile aýdany, Kúrti aýyldyq okrýgindegi «Dáýlet-Beket» JShS Gınnestiń rekordyn jańartý maqsatynda «Álemdegi eń úlken túıe kerýeni – 2025» is-sharasyn ótkizdi.
Bastama Almaty oblysy ákimdiginiń qoldaýymen, «Dáýlet-Beket» kompanııasynyń jetekshiligimen júzege asty. Kerýen quramyna 1000 túıe engizilip, olar arnaıy daıyndalǵan bir shaqyrymdyq joldy júrip ótti. Buǵan deıingi álemdik rekord 2022 jyly Qytaıda tirkelgen bolatyn. Ol kezde tek 365 túıe qatysqan edi. Osylaısha, elimiz bul jetistikti úsh eseden astam arttyryp, álem nazaryn ózine aýdardy.
Almaty oblysy ákiminiń orynbasary Baqytnur Baqytuly saltanatty is-sharaǵa qatysýshylardy quttyqtaı kelip: «Bul – tek mádenı is-shara emes. Búgingi myń túıeden quralǵan kerýen halqymyzdyń kóshpeli ómir saltynyń murasyn álemge pash etken tarıhı oqıǵa», dep atap ótti.
Ulttyq rýhty jańǵyrtý, kóshpeli mádenıetti dáripteý, sondaı-aq týrızm men kásipkerlikti damytý maqsatynda ótken is-sharasy aıasynda ulttyq qolóner kórmesi uıymdastyryldy. Ulttyq naqyshtaǵy bes kıiz úı tigilip, qonaqtarǵa dástúrli taǵamdar usynyldy.
«Álemdegi eń úlken túıe kerýenine bel býǵanyma 6 aı boldy. Arnaıy komıssııa tekserip, maldyń bir qolda tirkelgenin, onyń pasportyn anyqtaýǵa 3 aı ýaqyt ketti. Túıeni kerýenge daıyndaýǵa taǵy da 3 aı merzim ótti. Búgin oıǵa alǵan isimiz sátti aıaqtaldy. Túıe kerýenin eki jaqtan vıdeofıksasııa jasady. Ony arnaıy komıssııa 2 aptadan 3 aı aralyǵynda qarap, qorytyndysyn shyǵarady», – dedi «Dáýlet-Beket» JShS-niń dırektory Sydyq Dáýletov.
2001 jyly qurylǵan sharýashylyqta búginde 5 myńnan astam oısylqara ósiriledi. О́risin qazaqtyń qos órkeshti túıesi, túrikmenniń arvana tuqymdarymen toltyryp otyrǵan seriktestiktiń jalpy jer kólemi 28 812 gektardy quraıdy. Ortasha eseppen táýligine 5000–7000 lıtr sút nemis tehnologııasymen saýylady. 2021 jyly jeke ınvestor esebinen túıe sútin untaq sútke aınaldyratyn jańa zamanaýı zaýyt iske qosyldy. Onda táýligine 1 tonna, aıyna 30 tonnaǵa deıin shubat untaǵy shyǵarylady. Kásiporynnyń tabıǵı taza ónimderi elimizden ózge, Qytaı, Reseı memleketterine eksporttalady. Fermada 100 orynǵa arnalǵan shubat, saýmalmen emdeý ortalyǵy jumys isteıdi. Osy kúnge deıin on myńǵa jýyq adam túıe sútiniń terapııasyn qabyldaǵan.
Sonymen qatar Almaty qalasynda «Sydyq» atty arnaıy dámhanalary tutynýshylarǵa qyzmet kórsetedi. Túıe sútinen jasalǵan qurt-irimshik túrlerin kóbeıtý, 30 mlrd teńgege kúre joldyń boıynan sapa standarttaryna saı túıe ónimin óńdeýdiń klasterin jasaý josparda bar. Seriktestik basshysy keleshekte túıe sanyn 10–15 myńǵa jetkizýdi kózdep otyr.
Is-sharaǵa Anglııadan arnaıy kelgen Gınnestiń rekordtar kitabynyń ókili Rıchard Stennıng qatysyp, kerýenniń ár qımylyn qatań baqylap otyrdy. «Men mundaı kólemdegi túıe kerýenin birinshi ret kórip otyrmyn. Qazaqstannyń bul jetistigi ulttyq mádenı mura ǵana emes, búkil álemdik qazyna retinde baǵalanýǵa tıis», – dedi ol.
Almaty oblysy