Qajylyqqa barý tártibi retteldi

Jaqynda QMDB Qajylyq mıssııa­synyń ókilderi Saýd Arabııasy Qa­jylyq mınıstrliginiń laýazymdy qyzmetkerlerimen kezdesip, qajylyq saparyna qatysty týyndaǵan keıbir máseleler tóńireginde kelissózder júr­gizdi. 

Qazaqstandyq delegasııa bu­ǵan deıin qajylyqqa baılanys­ty (ushý kestesiniń qolaısyzdyǵy, qajylyq saparynyń 30 kúnge sozylýy, tikeleı reıstiń bolmaý sebebinen halyqaralyq áýejaılarda 16 saǵatqa deıin kútý, bılet baǵasynyń kóterilýi, t.b.) tóńireginde týyndaǵan máselelerdi otandastarymyzdyń paıdasyna sheshýge qol jetkizdi. Bıyl qajylyq sapary 2015 jyldyń 11 qyrkúıeginen bastalady. Basty jańalyq – tuńǵysh ret Astana, Al­maty, Shymkent qalalarynan Jıdda baǵyty boıyn­sha tikeleı reıstiń ashylýy. Bul – Qazaqstan qajylary úshin mol múm­kindik, úlken jeńildik. Jıdda qalasyna tikeleı reıstiń bolmaýyna baılanysty Qazaqstan qajylary Túrkııanyń, Birikken Arab Ámirlikteri áýejaılarynyń qonaq úıle­rinde nemese kútý zalynda uzaq ýaqyt óz reısterin kútetin. Orta jolda ıhramdy (er kisilerdiń qajylyq kezinde kıetin tigisi joq eki aq mata) kııýde de qolaısyz jaǵdaılarǵa tap bolatyn. Saýdııa bıliginiń qajy­lyq erejelerine ózgerister engizýi nátıjesinde Qazaqstan qajylary úshin tikeleı reısterdiń kestesi beki­tildi. Qajylardy tasymaldaý jumysyn Saýd Arabııasy Koroldigi men Qazaqstan Respýblıkasy Investısııalar jáne damý mınıstrliginiń Azamattyq avıasııa komıteti arasynda qabyldanǵan memorandým boıynsha belgilengen arnaıy áýe kompanııalary júzege asyrady. Buǵan deıin jerlesterimiz tran­zıttik reıstermen bir kúnge jýyq ýaqytyn, dálirek aıtqanda, 14-16 saǵa­tyn jolǵa shyǵyndasa, endi 6 saǵattyń kóleminde qasıetti qalaǵa barýǵa múmkindik aldy. Igi bastama eń áýeli ýaqyt pen qarjyny únemdeýge oń yqpal etedi. Endi besinshi paryzyn óteýshi azamattar Qazaqstannan ıhram kıimin kıip, tikeleı Mekke qalasyna baǵyt alady. Jýyrda aqparat quraldarynda talqylanǵan qajylyq saparynyń 30 kúnge deıin uzaq merzimge sozylý máselesi de Saýd Arabııasynda ótken kelissózder nátıjesinde 17-22 kún merzimge ýaǵdalasyldy. Osy­ǵan oraı, qajylyq shyǵyndary da azaımaq. Búgingi tańda qajylyqqa baratyn azamattardyń tańdaýy boıynsha, materıaldyq múm­kindikterine oraı olarǵa ártúrli deń­geıdegi standart paketter usynyl­ǵan. Qajylyq fırmalardyń usynǵan standart pakettegi bir adamǵa jumsalatyn shyǵyn 3200-3900 dollardy quraıdy. Tipti, 2900 dollar kólemindegi ekonompaketter de qarastyrylǵan. QMDB qajylyq mıssııasy fır­malardan baǵany sebepsiz kótermeýdi eskertedi ári bul máseleni qadaǵalaıdy. QMDB osy eskertýlerdi oryndamaǵan fırmalardy qajylyq kvota berý quqyǵynan aıyryp, olarǵa qatysty sharalar qabyldaıtynyn da málimdeıdi. Dinı basqarma qajylarǵa qolaıly jaǵdaı jasaýǵa árqashan múddeli. Qajylyq – qulshylyq etý degen sóz. Qajylyq saparyn týrızmmen nemese tabys tabý kózimen baı­lanystyrýǵa bolmaıdy. Alaıda, qa­jy­lyq talaptary men erejelerin qatań saqtaýdy da umytpaýymyz kerek. Kóptegen musylman elderinde qajylyq saparyn sol memlekettiń resmı múftııaty, ıaǵnı dinı basqarmasy uıymdastyrady. Mundaı júıe Túrkııada burynnan qalyptasqan. Qa­zaqstan musylmandary dinı bas­qarmasy elimizdegi orta jáne shaǵyn kásipkerlikti damytýǵa úles qosý maq­­satynda qajylyq saparynyń uıym­dastyrý jumystaryn 20 qajy­lyq fırmalardyń quqyǵyna bergen. Dinı basqarmanyń ustanymy – ashyq naryq júıesin odan ári damytý, qajylyqtyń uıymdastyrý jumystaryn belgili bir qurylymnyń jekemenshigine aınaldyrmaý, qajy­larǵa kórsetiletin qyzmet sapasyn joǵary deńgeıge jetkizý, qajylyq maý­symynda ádil ári ashyq jumys júrgizý júıesin qalyptastyrý. Múf­tııat osy múddeler turǵysynan talap qoıady jáne onyń júzege asýyn baqylaıdy. QMDB Qajylyq mıssııasynyń negizgi mindeti – qajylyq maýsymyn­da atqarylatyn dinı rásimderdi, qul­shylyq etý tártipterin túsindirý, dinı saýattandyrý jumystaryn júrg­i­zý, qajylarǵa qolaıly jaǵdaı jasaý sharalaryn úılestirý.

«Egemen-aqparat».