IýNESKO-nyń Materıaldyq emes mádenı murany saqtaý jónindegi 2003 jylǵy Konvensııasyn júzege asyrýǵa arnalǵan oqytý semınary ótti. Is-sharany Mádenıet jáne aqparat mınıstrliginiń qoldaýymen Qazaqstandyq qoǵamdyq damý ınstıtýty uıymdastyrdy, dep jazady Egemen.kz.
Semınarǵa elimizdiń túkpir-túkpirinen 30-dan astam qatysýshy jınaldy. Olardyń qatarynda eldegi ákimdikterge qarasty mádenıet basqarmalarynyń, ulttyq, óńirlik mýzeılerdiń jáne akademııalyq qaýymdastyqtyń ókilderi bar.
Qatysýshylarǵa IýNESKO-nyń halyqaralyq fasılıtatory Solmon Serendorj, Azııa-Tynyq muhıty óńirlik tizilimi boıynsha IýNESKO kishi komıtetiniń múshesi, Qyrǵyz Respýblıkasy Ala-Too halyqaralyq ýnıversıtetiniń Ǵylym jáne ınnovasııalar jónindegi prorektory Aıjarqyn Qojabekova, 2003 jylǵy Konvensııa jónindegi halyqaralyq fasılıtator, IýNESKO-nyń 2-sanattaǵy ortalyqtarymen birlesip jobalar júzege asyrýǵa mamandanǵan otandyq trener Sanııa Bajeneeva ýorkshop ótkizip, ózara tájirıbe almasty.
Is-shara barysynda qatysýshylar Qazaqstannyń Ulttyq tizimine engizilgen materıaldyq emes mádenı murany qujattaý tásilderin úırenip, sheteldik tájirıbeni zerdeledi, sondaı-aq IýNESKO Konvensııasy aıasyndaǵy sońǵy úrdisterdi talqylap, jańa ádistemelerdi meńgerdi.
Semınarǵa qatysqan M.Tynyshbaev atyndaǵy ALT ýnıversıtetiniń oqytýshysy, antropolog Manat Qanaǵatulynyń aıtýynsha, is-shara teorııalyq jaǵynan ǵana emes, tájirıbe turǵysynan da paıdaly boldy.
«Bul semınarda trenerlerdiń materıaldyq emes mádenı muranyń áralýandylyǵyn erekshe kórsete bilgendigin basa aıtý kerek. Olar ár aımaqtyń rýhanı mádenıetine tán erekshelikterge nazar aýdaryp, muralardy birdeı deńgeıde saqtaý men qujattaý isiniń mańyzyn ekshedi. Osy oraıda rýhanı mádenıetti urpaqtan-urpaqqa jetkizip júrgen mamandar jumysynyń halyqaralyq deńgeıde nasıhattalýy ár eldiń mádenı saıasatynyń sapaly júrgizilip jatqanyn aıqyndaıdy», dedi ol.
Úsh kúndik oqý baǵdarlamasy «MEMM-ny qorǵaý jónindegi halyqaralyq saıasatqa kirispe», «2003 jylǵy Konvensııa: saqtaý sharalary, saıasaty jáne ınstıtýttar», «Qoǵamdastyqqa negizdelgen ınventarızasııa (túgendeý júıesiniń negizin ázirleý)» jáne basqa da ózekti taqyryptardy qamtydy.
IýNESKO-nyń halyqaralyq fasılıtatory Solmon Serendorj semınarda taqyryptar jan-jaqty ashylyp, qundy bilim berildi dep baǵalady.
«Semınar bastalar aldynda qatysýshylar qoǵamdastyqtardyń materıaldyq emes mádenı muraǵa qosatyn úlesi týraly naqty jaýap bere almaǵan edi. Al semınar aıaqtalǵan soń olar qoǵamdastyqpen birlesken jumystyń nátıjesinde qujattamanyń sapaly bolatynyna kóz jetkizdi», dedi spıker.
Jalpy is-sharanyń maqsaty – mádenıet salasyndaǵy mamandar men sarapshylardyń materıaldyq emes mádenı murany (MEMM) saqtaý jónindegi jobany júzege asyrý, qujattaý jáne túgendeý jónindegi bilimin jetildirý jáne kásibı qyzmetine qajet praktıkalyq mashyqtardy úıretý.
Semınar osy saladaǵy jumysty júıeleýge jáne ony sátti júzege asyrýǵa arnalǵan mańyzdy qadam boldy. Qatysýshylar ózara tájirıbe almasyp qana qoımaı, aldaǵy birlesken jobalaryn sarapqa salyp, kásibı ortadaǵy yntymaqtastyqty keńeıtti.