Kelesi jyly 1 qańtardan bastap «Qazsýshar» RMK men sý paıdalanýshylar arasyndaǵy sýarmaly sý berý boıynsha kelisimsharttar onlaın formatta ǵana jasalady. Bul shara – sýdyń «kóleńkeli naryǵyna» tosqaýyl qoıýdy kózdeıdi, dep jazady Egemen.kz.
О́tinim qabyldaý, kelisimshart jasaý jáne tólem júrgizý úderisterin avtomattandyrýǵa arnalǵan arnaıy bıllıng júıesin ázirlep jatqan Sý resýrstary jáne ırrıgasııa mınıstrligi qarasha aıynda bıllıng júıesin pılottyq rejımde iske qosýdy josparlap otyr.
Sala mınıstrliginiń málimetinshe jańa júıe iske qosylǵannan keıin «Qazsýshar» RMK sý paıdalanýshylarmen elektrondy kelisimsharttar jasaıdy, al tólemder ekinshi deńgeıli bankterdiń mobıldi qosymshalary arqyly júzege asady.
Sý resýrstary jáne ırrıgasııa mınıstri Nurjan Nurjigitovtiń aıtýynsha kelesi jyldan bastap barlyq kelisimshart elektrondy formatta rásimdelýi kerek. Bul talap sharýa qojalyqtaryna, óndiristik kásiporyndar men basqa da sý paıdalanýshylarǵa birdeı qoldanylady.
«Tólem de tek qana elektrondy túrde júrgizilýi kerek. Bul bólingen sý resýrstarynyń ashyqtyǵy men naqty esebin qamtamasyz etý úshin qajet. Burynǵy kelisimsharttardy da júıege engizý qajet», dedi N.Nurjigitov.