Mashına jasaýshylar bas qosty

Keshe elordada «QMJO» basqarma tóraǵasy Meıram Pishembaevtyń tóraǵalyǵymen «Qazaqstannyń mashına jasaýshylar odaǵy» zańdy tulǵalar birlestigine qatysýshylar men Parlament Májilisiniń depýtaty bas qosqan otyrys ótti. Onda kún tártibindegi birqatar máseleler keńinen talqylanyp, uıymnyń ishki jaǵdaılaryna túzetýler engizildi. Odaq qyzmetine túzetýler engizý qajettigi el zańna­ma­syndaǵy ózgerister men Qazaq­stannyń Dúnıejúzilik saýda uıymyna kirýi barysynda týyn­dap, bul rette mashına jasaý kásiporyndary úshin jańa múm­kindikterge jol ashyldy. «Búgingi basqosýdyń maqsaty – mashına jasaý salasynyń fýnksııalary  «Ulttyq kásipkerler pa­latasy týraly» Zańyna sáıkes olar­dan Qazaqstannyń mashına jasaýshylar odaǵyna ótýine aılanysty bolyp otyr, degen M.Pishembaev búginde  iri-sha­ǵyn kásiporyndar qamtylǵan búkil mashına jasaý salasyn, Qazaq­stannyń barlyq bıznes qaýym­dastyǵyn nyǵaıtý úshin erejelerge birqatar ózgerister engizý qa­jet­tigin atap ótti.  Onyń aıtýy boıynsha, 1500-den astam kásip­orynnyń ishinde 30 paıyzy – shaǵyn jáne orta bıznes salasy bolǵandyqtan, iri mashına jasaý kásiporyndarynyń aınalasynda shaǵyn jáne orta bıznesti damytý men oǵan qoldaý kórsetý múmkindigin týdyrýǵa basymdyq berilý qajet. Qazirgi tańda alda Údemeli ın­dýstrııalyq-ınnovasııalyq da­mý baǵdarlamasynyń ekinshi bes­jyldyǵy aıasynda mashına jasaý salasyn odan ári damytý, ony jaqsy deńgeıde jetil­dire túsý máselesi tur, dedi M.Pishembaev. Bul rette DSU-ǵa kirýdiń  Qazaqstannyń ekonomı­kalyq órleýi, jańǵyrýy men bá­sekege qabilettiligi úshin mańyzdy qadamdardyń biri bolyp tabylatyndyǵy jáne  elimizdiń  halyqaralyq standarttarǵa saı  bolýy qajettigi aıtyldy. «Al mashına jasaý salasynyń qarqyndy damýy memleket úshin tıimdiligin kórsetip keledi. Sol sebepti, atalǵan salany durys jáne joǵary dárejede damyta túsýge basymdyq berýimiz tıis», deı otyryp, M.Pishembaev taý-ken, transport salasynan bólek taǵy da munaı-gaz ben ınnovasııa máselelerine, sondaı-aq, aýylsharýashylyq mashına jasaý isine de nazar aýdar qajettigine toq­taldy. Bul oraıda osyǵan qa­tys­ty qural-saımandar shyǵa­ra­tyn, et óńdeıtin zaýyttar salynýy kerek ekendigin jetkizdi. Onyń aıtýy boıynsha, mal azyǵyn daıyndaıtyn kishi zaýyttar ózimizde de salynyp, ımportty azaıtýǵa kóńil bólinýi qajet. Indýstrııalandyrý baǵdar­la­masynyń ekinshi tolqynynda eskeretin jaıt ta osy ekendigine nazar aýdara otyryp, shaǵyn jáne orta bıznesti jolǵa qoıý kerektigi aıtyldy. Qazaqstannyń mashına jasaýshylar odaǵy qatysýshylarynyń jalpy jınalysynyń barysynda uıym jarǵysyndaǵy qosymshalar men ózgerister qarastyrylyp, úılestirý jáne baqylaý keńesteriniń, basqarma jáne revızııalyq komıssııanyń quramy anyqtaldy. Elmıra MÁTIBAEVA, «Egemen Qazaqstan».