Dýshanbe qalasynda «Jasyl ınvestısııalar: turaqty bolashaq úshin qazirgi múmkindikter» taqyrybynda ekinshi «Dýshanbe halyqaralyq ınvestısııalyq forýmy – 2025» ótti. Is-shara barysynda Qazaqstan – Tájikstan yntymaqtastyǵynyń qazirgi jaǵdaıy men damý perspektıvalary qaraldy.
Forýmǵa 30-dan astam elden kelgen 600-den astam sheteldik qonaqtar, halyqaralyq uıymdar men qarjy ınstıtýttarynyń ókilderi qatysty. Is-sharany Tájikstan Respýblıkasynyń Prezıdenti Emomalı Rahmon ashty.
Qazaqstan delegasııasyn bastap barǵan Premer-mınıstrdiń birinshi orynbasary Roman Sklıar plenarlyq otyrys kezinde forýmnyń eki el úkimeti men kompanııalary arasyndaǵy ózara is-qımyldyń mańyzdy quralyna aınalǵanyn atap ótti. Kún tártibinde ekijaqty saýda-ekonomıkalyq jáne ınvestısııalyq yntymaqtastyqty odan ári damytý, kólik jáne logıstıka, energetıka, aýyl sharýashylyǵy, qarjy jáne basqa da salalardaǵy ózara baılanystardy nyǵaıtý máseleleri qaraldy.
R.Sklıar forýmda belgilengen baǵyttar qazirgi ınvestısııalyq saıasattyń negizine aınalyp, Qazaqstanda keń qoldaý taýyp otyrǵanyn atap ótti. Elimiz jasyl transformasııa, energııa tıimdiligin arttyrý jáne ónerkásipti sıfrlandyrý baǵytyn dáıekti túrde júzege asyryp keledi.
Taraptar qabyldanǵan sheshimder ekijaqty qatynastardy barlyq baǵyttar boıynsha odan ári nyǵaıtyp, tereńdete túsýge yqpal etetinine senim bildirdi.
Kelesi Dýshanbe halyqaralyq ınvestısııalyq forýmyn 2027 jyly ótkizý josparlanyp otyr.