Jasandy ıntellektiniń qarqyndy damýy bolashaq maman bolatyn búgingi stýdent pen oqytýshynyń JI jónindegi bazalyq saýatyn arttyrýdy talap etedi. Osy maqsatta «AI-Sana» baǵdarlamasy ázirlenip, ony kezeń-kezeńimen engizý bastaldy. Sol aýqymdy istiń barysy, aıaq alysy qalaı? Bul týraly Ortalyq kommýnıkasııalar qyzmetinde ótken brıfıngte keńinen baıandaldy.
Baspasóz jıynynda Ǵylym jáne joǵary bilim vıse-mınıstri Dınara Sheglova baǵdarlama barlyq deńgeıdegi stýdentterdi, magıstranttardy, jas zertteýshilerdi qamtıtynyn aıtty.
«Birinshi kezeńde 650 myń stýdentti jasandy ıntellekt negizderine, jasandy ıntellektini basqarý daǵdylaryna oqytý kózdelgen. Qazirgi tańda stýdentter kýrstardan ótip, sertıfıkat aldy. Olar «Huawei», «Coursera», «Astana Hub» jáne ýnıversıtetterdiń jeke baǵdarlamalary boıynsha oqydy. Kelesi kezeńderde – jasandy ıntellektini tereńdetip oqytý, tehnologııalyq kásipkerlik, salalyq jobalar ázirleý jáne startaptardy akselerasııalaý josparlanǵan. Osylaısha, «AI-Sana» baǵdarlamasy EKSPO aýmaǵynda ornalasqan «Alem.ai» halyqaralyq jasandy ıntellekt ortalyǵy úshin adam kapıtalynyń negizgi kózi bolady», dedi mınıstrdiń orynbasary.
D.Sheglovanyń aıtýynsha, «AI-Sana» baǵdarlamasynyń birinshi kezeńi aıasynda stýdentter ótetin negizgi kýrstar bar. Oqytý «Huawei», «Astana Hub» jáne «Coursera» sııaqty jetekshi halyqaralyq seriktestermen birlesip júzege asyrylyp jatyr jáne bul jasandy ıntellektiniń keń baǵytyn qamtıdy. Stýdentter atalǵan kýrstardy sátti aıaqtaǵannan keıin sertıfıkattar ıelenedi. Búgingi tańda elimizdiń 80 joǵary oqý ornynda 137 JI-agent engizilgen, al taǵy 363 JI-agent ázirleý satysynda tur. Stýdentter ázirlep jatqan eń tanymal JI-agentterge – JI-qabyldaý komıssııasy, JI-chek, JI-proktorıng, JI-lektor, JI-kitaphana, JI-psıholog jáne bilim úderisteriniń tıimdiligin arttyrý men joǵary oqý oryndarynyń qyzmetin avtomattandyrýǵa baǵyttalǵan ózge de mamandandyrylǵan sheshimder jatady.
«Buǵan deıin mınıstrlik «AI-Sana» baǵdarlamasy aıasynda Prezıdenttiń tapsyrmalaryn iske asyrý boıynsha júıeli jumys júrgizgenin atap ótkim keledi. Buǵan deıin qoıylǵan barlyq mindet belgilengen tártippen oryndalyp, aldaǵy qadamǵa qajetti negiz daıyndaldy. Sonymen qatar osy jyly 1 qazanda ótken Keńeste Memleket basshysy jańa mindetterdi aıqyndady: «AI-Sana» baǵdarlamasyn odan ári iske asyryp, kadrlyq áleýetti damytý arqyly maman daıarlaýdyń jańa kezeńine kóshý; Ǵylymı serpilisterge jol ashatyn jáne quzyretter ortalyǵyna aınalatyn mamandandyrylǵan zertteý ýnıversıtetin qurý; Sapaly sıfrlyq resýrstar men zamanaýı oqytý standarttaryna qoljetimdilikti qamtamasyz etetin ulttyq bilim platformasyn ázirleý. Osylaısha, mınıstrliktiń aldaǵy jumysy osy strategııalyq baǵyttarǵa sáıkes qurylyp, elimizde jasandy ıntellekt salasyn júıeli túrde damytýǵa múmkindik beredi», dedi vıse-mınıstr.
Brıfıngte Joǵary jáne joǵary oqý ornynan keıingi bilim komıtetiniń basqarma basshysy Ryskúl Qudyrettýlaeva búgingi tańda jasandy ıntellekt salasynda kadr daıarlaý sheteldiń jetekshi ýnıversıtetterimen birlesip júzege asyp jatqanyn aıtty.
«Qazaqstandaǵy «Cardiff» ýnıversıtetinde jasandy ıntellekt ortalyǵy ashyldy, sondaı-aq qazirgi tańda 3 joǵary oqý orny naqty seriktestik jobalardy: Qorqyt ata atyndaǵy Qyzylorda ýnıversıteti SeoulTech-pen, Satbayev University City University of Hong Kong-pen, D.Serikbaev atyndaǵy Shyǵys Qazaqstan tehnıkalyq ýnıversıteti Lý Ban sheberhanasynyń bazasynda júrgizip otyr. Osyndaı tájirıbe basqa oqý oryndarynda da damyp keledi. Máselen, «Astana IT University», Halyqaralyq aqparattyq tehnologııalar ýnıversıteti, t.b», dedi R.Qudyretýllaeva.
Onyń baıandaýynsha, jasandy ıntellekt salasynda kadr daıarlaý jáne ǵylymı zertteýler júrgizý úshin joǵary oqý oryndarynda ınfraqurylymdy damytýǵa erekshe nazar aýdarylyp otyr. Jetekshi ýnıversıtetterdiń bazasynda ǵylym men praktıkany ushtastyratyn jasandy ıntellekt boıynsha arnaıy ortalyqtar men zerthanalar quryldy. Búginde jasandy ıntellekt ortalyqtary elimizdiń birqatar oqý ornynda tabysty jumys istep jatyr. Sonymen qatar jasandy ıntellekt boıynsha arnaıy kafedralar da 4 ýnıversıtette ashyldy. Odan bólek, ǵylymı zerthanalar da jumys isteıdi. Nazarbaev ýnıversıtetinde «Aqyldy júıeler jáne jasandy ıntellekt» dep atalatyn arnaıy ınstıtýt byltyr bólek ǵylymı zertteý ınstıtýty bolyp zańdy tulǵa retinde qaıta quryldy.
Baspasóz konferensııasynda sóılegen úshinshi spıker L.N. Gýmılev atyndaǵy EUÝ Sıfrlandyrý jónindegi prorektory Gúlmıra Bekmanova ýnıversıtette «AI-Sana» baǵdarlamasy belsendi túrde júzege asyrylyp jatqanyn jetkizdi. Onyń sózine qaraǵanda, atalǵan baǵdarlama oqý, ǵylym jáne ınnovasııany biriktiretin ekojúıege aınaldy. Bul jasandy ıntellekt quzyretterin qalyptastyryp qana qoımaı, ýnıversıtettiń praktıkalyq mindetin sheshýge arnalǵan naqty AI-ónimderdi de ázirlep jatyr.