Májilis spıkeri Erlan Qoshanovtyń tóraǵalyǵymen bıýro ótip, aldaǵy jalpy otyrystyń kún tártibi naqtylandy.
Jalpy otyrysta depýtattardyń qaraýyna «Qazaqstan Respýblıkasyndaǵy bankter jáne bank qyzmeti týraly» zań jobasy jáne qarjy naryǵyn retteý jáne damytý máseleleri boıynsha túzetýler usynylady. Qujattardy ótken jylǵy 2 qyrkúıektegi jáne bıylǵy 8 qyrkúıektegi Prezıdent Joldaýyn júzege asyrý aıasynda Úkimet ázirlegen. Zań jobalary bank júıesiniń turaqtylyǵyn jáne básekege qabilettiligin arttyrýǵa, tutynýshylar quqyǵyn qorǵaýdy kúsheıtýge jáne ulttyq sıfrlyq ınfraqurylymdy damytýǵa baǵyttalǵan.
Sonymen qatar palataǵa birinshi oqylymda tarıhı-mádenı mura obektilerin qorǵaý máselelerine qatysty zańnamalyq túzetýlerdi talqylaý usynylady. Zań jobasy Parlament depýtattarynyń bastamasymen Memleket basshysynyń byltyrǵy 15 naýryzda ótken Ulttyq quryltaıdyń úshinshi otyrysyndaǵy arheologııalyq qyzmetti retteý týraly tapsyrmasyn oryndaý maqsatymen ázirlengen.
Jobada arheologııalyq jumystardy lısenzııalaý júıesin ózgertý, eskertkishter men arheologııalyq nysandar týraly derekterdi júıeleý, Birikken avtomattandyrylǵan aqparattyq júıe qurý, sondaı-aq Á.H.Marǵulan atyndaǵy Arheologııa ınstıtýty úılestiretin Ulttyq arheologııalyq qyzmettiń quzyretterin aıqyndaý kózdeledi.
Májilistiń salalyq komıtetteri birqatar jańa zań jobasyn jumysqa alady. Olar – 1993 jylǵy 22 qańtardaǵy jáne 2002 jylǵy 7 qazandaǵy Azamattyq, otbasylyq jáne qylmystyq ister boıynsha quqyqtyq kómek pen quqyqtyq qatynastar týraly konvensııalarǵa ózgerister engizý týraly hattamany ratıfıkasııalaý týraly, 2010 jylǵy 9 jeltoqsandaǵy Qazaqstan men Reseı Úkimetteri arasyndaǵy elimizge munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimniń qoldanylýyn qaıta bastaý jáne oǵan ózgerister engizý týraly hattamany ratıfıkasııalaý týraly zań jobalary.
Sondaı-aq depýtattar Ákimshilik quqyq buzýshylyq týraly kodekske energııa únemdeý jáne energııa tıimdiligin arttyrý máseleleri boıynsha engiziletin túzetýlerdi jumysqa alady.