Almaty – Qyzylorda arasyndaǵy 1200 shaqyrymdyq kúre jol boıyn turmystyq qaldyqtardan tazartý maqsatynda jolǵa shyqqan «Taza Qazaqstan» road-estafetasy jolaı ońtústik óńirdegi birneshe qala men aýdanda tazalyq sharalaryn júrgizip, halyqpen kezdesý uıymdastyra otyryp Qyzylordaǵa jetti.
Estafeta quramynda Májilistegi «Amanat» partııasy fraksııasynyń músheleri, partııa janyndaǵy «Jastar rýhy» jastar qanatynyń ókilderi, oblystyq, aýdandyq máslıhat depýtattary, ekoblogerler, eriktiler bar.
Jańaqorǵanǵa aıaldaǵan top músheleri respýblıkalyq mańyzy bar avtojol boıymen qatar, «Vandalızmge jol joq!» aksııasy aıasynda san ǵasyrdyń kýágeri Syǵanaq qalashyǵynyń aınalasyn tazartty. Kórshiles Shıeli aýdanynda Májilis depýtattary arnaıy qabyldaý ótkizip, «Jastar rýhy» jastar qanatynyń tóraǵasy Aqerke Eskendirova jastarmen pikir almasty. Qabyldaýlar men kezdesýler barysynda aýdan turǵyndarynyń suraqtaryna naqty jaýap berildi. Májilis depýtaty Murat Ábenov Shıelidegi qabyldaýda jastar tarapynan utymdy usynystar aıtylǵanyn atap ótti. Almaty oblysynan bastaý alǵan aksııaǵa qatysýshylar 4 oblys, 1 qala, 15 aýdan aýmaǵyna tazalyq júrgizip, 10 myń tonnadan astam qoqysty qaıta óńdeýge jóneltti.
«Taza Qazaqstan» árqaısymyzdan bastalady. Sondyqtan turǵyndarǵa, jastarǵa qoqys jınaý ǵana emes, sonymen qatar ekologııalyq mádenıetti qalyptastyrý, sýdy únemdeý, qoqysty suryptaý máselelerin túsindirdik», deıdi estafeta músheleri.
Qyzylordadaǵy aksııany qorytyndylaý sharasyna qala ákimi Nurjan Ahatov, «Amanat» partııasy Qyzylorda oblystyq fılıalynyń atqarýshy hatshysy Láılá Tóreshova, partııanyń oblystyq fılıaly janyndaǵy ekologııalyq keńes tóraǵasy Jorabek Nurymbetov, eńbek ardagerleri qatysyp, ortaq iske úles qosqandarǵa rızashylyǵyn bildirdi.
QYZYLORDA