Áleýmettik jelide astanalyqtar apta boıy qyzý túspeı, deneni meńdeıtin «jańa vırýs» taralyp ketkenine shaǵymdanyp jatyr. Jelidegi jazbaǵa súıensek, «belgisiz vırýsqa» shaldyqqandar sany artyp, tipti aýrýhanalarda bos oryn tabý qıynǵa soǵyp tur, dep jazady Egemen.kz.
«Sımptomdary qarapaıym tumaý sııaqty, biraq temperatýra 39°C-qa deıin kóteriledi, ońaılyqpen túspeıdi. Keshe jedel járdemdi 30 mınýt kúttim. Emhanada kezek kóp, aýrýhanada oryn joq», dep jazǵan jeli qoldanýshylarynyń biri.
Jelide jeldeı esip turǵan osy mazmundaǵy jazbalarǵa sebep bolǵan qandaı vırýs ekenin bilmekke Astana qalalyq Densaýlyq saqtaý basqarmasyna suraý saldyq.
Mamandar redaksııamyzǵa bergen jaýabynda elordadaǵy epıdemıologııalyq ahýaldy turaqty dep baǵalaǵan. Dese de, JRVI jáne tumaý boıynsha aýrýhanaǵa jetkizilgen naýqastardyń sany ádettegiden artqan.
«Naýqastar kóbine, aýrýhanaǵa keshki ýaqytta óz betinshe júginip jatyr. Sáıkesinshe, bul aýrýhana júktemesine áser etýde. 4 qarashadaǵy málimet boıynsha, №3 balalar aýrýhanasynda JRVI jáne tumaýmen dıagnozymen 235 bala em qabyldap jatyr. Aýrýhanadaǵy jalpy tósek-oryn sany – 465. Tumaýmen aýyratyn balalar sany artqan jaǵdaıda qosymsha taǵy 100 tósek-oryn ashý kózdelgen. Sonymen birge, Astana qalasynyń barlyq bastapqy medısınalyq-sanıtarııalyq kómek (BMSK) uıymdarynda 08:00-den 20:00-ge deıin fıltr kabınetter jumys istep tur», delingen basqarma jaýabynda.
Basqarma stasıonarlarda JRVI jáne tumaýmen aýyratyn naýqastardy emdeýge arnalǵan dári-dármek, medısınalyq maqsattaǵy buıymdar men dezınfeksııalyq quraldar jetkilikti ekenin málimdedi.