Bıyl óńir mádenıetiniń qara shańyraǵyna aınalǵan A.Toqpanov atyndaǵy oblystyq Qazaq drama teatry 90 jyldyq torqaly toıymen qatar, qazaqtyń tuńǵysh kásibı rejısseri, Qazaqstannyń halyq ártisi Asqar Toqpanulynyń 110 jyldyq mereıtoıyn toılap jatyr. Eki birdeı mereıli data aıasynda Tarazda respýblıkalyq teatr festıvali uıymdastyryldy.
Úlken sahnada Asqar Toqpanovtyń beınesi kórsetilip, jasandy ıntellekt arqyly qaıta jańǵyrǵan daýsy kópshiliktiń nazaryna usynyldy. Is-sharaǵa arnaıy ázirlengen mınıatıýralar men kórinister kórermendi aıryqsha áserge bóledi. Teatr toıyna arnaıy qatysqan óńir basshysy Erbol Qarashókeev qazaq saharasynyń ár buryshynan kelgen meımandarǵa qurmet kórsetti.
«Elimizde óner men mádenıetke, sonyń ishinde teatr salasyna turaqty túrde qoldaý kórsetilip keledi. О́ıtkeni teatr sahnasynda kóterilgen árbir másele – qoǵamnyń búgingi tynysy. Munda qoıylym ǵana emes, ómirdiń ózi óriledi.
Prezıdentimiz óz sózinde: «Táýelsizdik jyldarynda mádenıet salasynda kóp jumys atqaryldy. Sahna ónerine qushtar jastardyń kóbeıýi – qýanyshty jaıt. Ásirese aımaqtarda teatrlardy salýǵa jáne damytýǵa erekshe mán berý kerek», – dep atap ótken bolatyn. Bul bastama óńirimizde kópten beri kóterilip júrgen máseleniń biri – jastar teatrynyń ashylýyna túrtki boldy. Halyq suranysyn eskere otyryp, «Taraz» jastar teatry stýdııasy ashylyp, óńirdiń mádenı ómirine jańa serpin berdi», degen Erbol Shyraqpaıuly mádenıetke qyzmet etken birqatar azamatty «Oblysqa sińirgen eńbegi úshin» belgisimen, Qurmet gramotasymen jáne Alǵyshatpen marapattady.
KSRO jáne Qazaqstannyń halyq ártisi, Memlekettik syılyqtyń laýreaty Asanáli Áshimov, Qazaqstannyń halyq ártisi, teatr qaıratkerleri odaǵynyń tóraǵasy Tuńǵyshbaı Jamanqulov júrek tórinde saqtalǵan esti estelikterin aıtyp, Asqar Toqpanovtyń qazaq ónerindegi orny týraly tolǵamdy oılarymen bólisti.
Festıval shymyldyǵy Meıram Habıbýllınniń qoıýymen S.Qojamqulov atyndaǵy Ulytaý oblystyq qazaq mýzykalyq drama teatry sahnalaǵan Georg Bıýhnerdiń «Voısek» dramasymen ashyldy. A.Toqpanov atyndaǵy oblystyq qazaq drama teatry festıvaldan tys, qonaqtarǵa arnap Mirjaqyp Dýlatulynyń «Baqytsyz Jamal» tragıfarsyn qoısa, Q.Qojamııarov atyndaǵy respýblıkalyq memlekettik akademııalyq uıǵyr mýzykalyq teatry Ǵabıt Músirepovtiń «Qozy men Baıan» tragedııasyn uıǵyr tilinde kórermen nazaryna usyndy.
Atyraý oblystyq Mahambet atyndaǵy akademııalyq qazaq drama teatry qoıǵan Muhtar Áýezovtiń «Qorǵansyzdyń kúni» tragedııasynda aq pen qara, meıirim men qatygezdik uǵymdary kórinis tapty. Rejısseri Gúlnaz Qamysbaeva bolǵan qoıylymnyń bir ereksheligi – munda tek názikjandar ǵana óner kórsetti. R.Seıitmetov atyndaǵy Túrkistan sazdy drama teatry Áldıhan Qaldybaevtyń «Jalǵyz jelken» shyǵarmasyn sahnalady. Rejısseri – Aıdar Naýryzbaev. Munda sybaılas jemqorlyqpen kúres – oqıǵanyń negizgi ózegi. Tipti úlken laýazym ıesi eshqandaı kedergige qaramastan jemqorlyqtyń tamyryn úzbekshi bolady. Festıval shymyldyǵy B.Rımova atyndaǵy Taldyqorǵan drama teatry sahnalaǵan Aleksandr Volodınniń «Kezdesý men qoshtasý» atty dramasymen jabyldy.
Respýblıkalyq teatr festıvaliniń qazylar alqasyna Muhtar Áýezov atyndaǵy Qazaq ulttyq teatrynyń dırektory, Qazaqstannyń eńbek sińirgen qaıratkeri Erkin Jýasbek tóraǵalyq etti. Qazaqstannyń halyq ártisi Tuńǵyshbaı ál-Tarazı, ónertaný ǵylymdarynyń kandıdaty Baqyt Núrpeıis, «Qurmet» ordeniniń ıegeri, rejısser Qýandyq Qasymov, Temirbek Júrgenov atyndaǵy Qazaq ulttyq óner akademııasynyń professory Merýert Jaqsylyqova qazylar quramynan tabyldy.
«Úzdik akterlik dýet» atalymy B.Rımova atyndaǵy Taldyqorǵan drama teatry usynǵan «Kezdesý men qoshtasý» dramasyndaǵy akter Aman Qojabekov pen aktrısa Ǵalııa Temirbaevaǵa berildi. «Úzdik er adam beınesi» Q.Qojamııarov atyndaǵy respýblıkalyq memlekettik akademııalyq uıǵyr mýzykalyq komedııa teatrynyń «Qozy men Baıan» tragedııasyndaǵy Qarabaı rólin somdaǵan Dilshat Amanbaevqa, «Úzdik áıel adam beınesi» S.Qojamqulov atyndaǵy Ulytaý oblysynyń qazaq mýzykalyq drama teatrynyń «Voısek» dramasyndaǵy aktrısa Gúlden Seıtkenovaǵa tapsyryldy.
«Úzdik rejıssýra» atalymyna rejısser Meıram Habıbýllın, «Asqar Toqpanov atyndaǵy arnaıy syılyq» atalymy Asqar Toqpanov atyndaǵy oblystyq qazaq drama teatry «Baqytsyz Jamal» spektakli, «Eń úzdik qoıylym» atalymyna S.Qojamqulov atyndaǵy Ulytaý oblysynyń qazaq mýzykalyq drama teatry «Voısek» týyndysymen ıe boldy. Barlyq atalym úshin dıplom jáne qarjylaı syılyqtar tabys etildi.
Taraz