ASTANA. 24 maýsym. Jaqynda Shymkent qalasynyń 52 jastaǵy turǵyny ánshi Gaýhar Álimbekovany jaqsy kóretinin, ony ómirlik jar etkisi keletinin baspasóz arqyly bildirgen edi. Osyǵan oraı ánshi usynys jasaǵan adamǵa óz jaýabyn berdi. Bul týraly «Zamana» gazetine silteme jasap ras.kz habarlady.
Ánshi Gaýhar Álimbekova: «Bul kisiniń tosyn áreketine tańdanyp otyrmyn. Eger ol aqyl-esi bútin, ón boıynda kemistigi joq jan bolsa, sezimin nege meniń ózime kelip aıtpaıdy? Qudaıǵa shúkir, qazir zaman damyǵan. Baılanysýdyń da túrli-túrli tásilderi bar. О́zime kelip, jaǵdaıyn aıtyp, unatyp júrgenin bildirse, onda áńgime basqasha bolar ma edi… О́ziniń jeke ómirin, sezimin kúlli jurtqa jarııa etkenin onsha túsinbeı otyrmyn», – dedi.
Al Almabek Tashmetov esimdi azamat budan shamaly kún buryn áıeli aýyr dertten qaıtys bolǵanyn, qazir jalǵyzdyqtan jabyǵyp júrgenin, múmkindigi bolsa, áli turmys qurmaǵan Gaýhar Álimbekovaǵa úılengisi keletinin aıtqan edi.
«Jaqynda Respýblıka saraıynda jeke án keshimdi ótkizdim. Sonda ázildep, júreginiń túgi bar azamatty izdep júrgenimdi aıtyp edim. Shamasy, bul kisi sodan keıin oılanǵan bolsa kerek. Endi… Buıyrǵanyn kórermiz. Biraq dál qazir ol kisimen kezdeseıin, kóreıin dep aıta almaımyn», – dep ashyǵyn aıtty Álimbekova.
Sonymen qatar, tanymal ánshi búginge deıin turmysqa shyǵyp, otbasy qurmaýynyń sebebin túsindirdi.
«Jolyqqan joq qoı. Áli kútýmen kelemin. Jalpy, otbasyn qurý, turmysqa shyǵý óte jaýapty másele. Men buǵan nemquraıdy qaraı almaımyn. Jasyratyn nesi bar, maǵan sezimin bildiretin azamattar az emes. Biraq júregimdi dir etkizip, ózine birden baýrap alatyn jandy áli kezdestirgen joqpyn. Shyny kerek, keıde jurttyń men týraly aıtqan ártúrli áńgimelerinen sharshaımyn, kózdi tars jumyp, aldymnan shyqqan azamattyń eteginen ustaı salǵym keledi. Sóıtip, eldiń óseginen qutylsam ba dep te oılanam. Biraq olaı isteı almaıdy ekenmin. Bazbireýler sekildi baı-baǵlandardyń ekinshi áıeli nemese azamattyq nekedegi ashynasy da bola almaımyn. О́ıtkeni, ondaı qylyq meniń tabıǵatyma jat. Men aýyldyń, ata-ananyń, kempir-shaldyń tárbıesinde bolǵan, qazaqtyń yrym-tyıymyn, salty men dástúrin sanama sińirip ósken qyzbyn. Aqsha, ataq úshin ózim súımegen adamnyń sońynan erip kete almaıdy ekenmin», — dedi Gaýhar Álimbekova.
Áńgime sońynda ánshi óziniń Instagram, Facebook sekildi áleýmettik jelilerde ne úshin otyrmaıtynyn da aıtty.
«Instagramyńyz» ne, «Ýatsap» degenniń ózin endi meńgerýdemin. Jurt aldyna shyǵa bergendi unatpaımyn. Áldebireýler sekildi ne iship-jegenin, qandaı kıim kıgenin, búgin kimniń toıynda án salǵanyn, tipti tońazytqyshynda qaı jylǵy soǵymnyń jatqanyn aıtyp, el aldynda elpildeı beretinderden emespin. Áleýmettik jelide jaǵdaıy tómen, birneshe jyldyq soǵym túgili bir kılo et taba almaı otyrǵan adamdar da bar shyǵar. Sondyqtan olardyń kóńil-kúıin túsirip, qyzǵanyshyn týdyryp, maıda-shúıde nárseni jaryqqa shyǵara bermegen jón. Ár adamnyń óziniń jeke ómiri, jurtqa jaıýǵa bolmaıtyn qupııasy bolýy kerek. Sonysymen de tartymdyraq kórinedi dep oılaımyn», – deıdi ánshi.
Talǵat Raıymbek.
Derek, sýret: ras.kz.