Aqtóbe oblysynda alıment óndirý boıynsha jeke sot oryndaýshylaryna kelip túsken 16 916 istiń 2 756-y ǵana aıaqtalǵan. 14 myńnan astamy áli de oryndalmaı tur, dep jazady Egemen.kz.
«О́ńirdegi 97 sot oryndaýshysy eń birinshi kezekte kámeletke tolmaǵan balalarǵa alıment óndirý, zańsyz jumystan bosatylǵandar quqyǵyn qalpyna keltirý men eńbekaqy qaryzdaryn ala almaı júrgenderdiń isimen shuǵyldanady. Túrli kedergige qaramastan osy baǵytta jumys jalǵasyp keledi. Sonyń dáleli, osy jyly alıment tóleýden jaltarǵandarǵa qatysty 425 ákimshilik is qozǵalyp, 69 boryshkerge aıyppul salyndy, 356 adam ákimshilik qamaýǵa alyndy», deıdi Aqtóbe oblysy boıynsha jeke sot oryndaýshylary óńirlik palatasy basshysynyń orynbasary Qaırat Tańqaev.
Salystyrmaly túrde qaraǵanda, jeke sot oryndaýshylarynyń qolyndaǵy alıment óndirý isteriniń memleket paıdasyna bereshekterdi óndirýge qaraǵanda sany az. Máselen, memleket kirisine bereshekterdi óndirip alý boıynsha tirkelgen 48 myńnan astam atqarýshylyq qujattyń 27 myńy tolyq oryndalǵan. Qalyp turǵany – 21 myńnan astam is.
Sot oryndaýshylary bereshek qaryzdaryn tóleýden jaltaryp júrgenderge qatysty túrli amalǵa barady. Sonyń eń tıimdisi – kóshedegi reıdtik sharalar.
«Boryshkerlerdi kóshede toqtatyp, kólikterin aıypturaqtarǵa salý – qaryzdy óteýdiń eń tez nátıje beretin ádisi», deıdi sot oryndaýshylary.