ASTANA. 24 maýsym. Astanada fýtboldan Qazaqstan Prezıdentiniń Kýbogy úshin ótip jatqan 17 jasqa deıingi jasóspirimder arasyndaǵy týrnırde Qazaqstan quramasy Ispanııadan 0:5 esebimen oısyraı jeńildi. Bul týraly egemen.kz habarlady.
Oıyn barysynda ıspandardyń basymdyǵy anyq baıqaldy. Matchtyń 20-mınýtynda Embola bizdiń qaqpadan sańylaý taýyp, esep ashty. Arada 13 mınýt ýaqyt ótkende ol ekinshi márte mergendigimen kózge tústi. Úziliske deıin tablodaǵy nátıje ózgergen joq.
Ekinshi taımda qonaqtar taǵy da jaýapsyz úsh gol soqty. Kezdesýdiń 57-mınýtynda Martın esepti eseledi. Sondaı-aq, Býskets (68) pen Agıero (78) da enshilerine bir doptan jazdy.
Al Qazaqstan quramasynan Mádı Jaqypbaev pen Batyr Qudaıberdinovtiń gol soǵatyn múmkindikteri bolǵan edi. Alaıda, olarǵa sáttilik jetispedi.
Jastarymyz úshinshi oıyndaryn erteń Tájikstanǵa qarsy ótkizedi. Ázirge bizdiń qurama 3 upaımen óz tobynda ekinshi orynda keledi.
Elaman Qońyr.
Derek: egemen.kz.
Sýret: presidentcup.kz.