“Qazaqstan” Ortalyq konsert zalynda ıne shanshar oryn bolǵan joq. Germanııa, AQSh, Reseı, Túrkııa, Qytaı elderiniń sahnasynda óner kórsetip júrgen maıtalman ártister ózderi kelip óner kórsetip jatqanda mundaı tarıhı oqıǵadan kimniń shet qalǵysy keledi deısiń. Reseıdiń halyq ártisi, Máskeý Úlken teatrynda basty partııalardy oryndaýshy Nıkolaı Sıskarıdzeniń ónerin bir tamashalap qalǵannyń ózi ne turady? Sahnada taý qyranyndaı qalyqtaıtyn bıshi qala kúnine orys kompozıtory Igor Stravınskııdiń mýzykasyna jazylǵan “Narsıss” bıin ádeıi daıyndap ákelgen kórinedi. Baqyt tańyn ańsaǵan ǵashyq júrektiń lúpilin jetkizetin shyǵarma jelisi mundaǵy jastardyń arman-muratymen úılese óriledi. Qaı jerde bolsyn adamzat balasynyń myzǵymas tirligine tıek bolar mahabbat tolǵamynyń tolaǵaı úmitine jolyǵasyz. Tek sol armannyń aqjelken sáýlesi ómir aıdynyna adastyrmaı alyp shyqsyn deńiz.
Qytaıdyń balet óneri ókilderiniń qaltqysyz plastıkalyq qalybyn qaıta-qaıta kóre bergiń keletini ǵajap. Halyqaralyq baıqaýlardyń laýreattary Saý Shýsy men Jang Shıdiń oryndaýyndaǵy A.Adannyń “Jızel” baletindegi kórinister qoıylymǵa shyǵystyq boıaý darytýymen daralanady. Osyǵan qosa K.Baıseıitova atyndaǵy ulttyq opera jáne balet teatrynyń trýppasy A.Borodınniń – “Knıaz Igor”, al Nıý-Iork sıtı baletiniń ónerpazdary Eshlı Býde men Endrıý Veıet L.Gottshalktiń – “Tarantella”, Berlın Shtatsoperden kelgen Elıza Kabrera men Mıhaıl Kanıskın D.Rossınıdiń – “Grand pas de deux”, Ankara memlekettik opera jáne balet teatrynyń tanymal bıshileri О́zge Basharan men Bahrı Gıýrdjan P.Chaıkovskııdiń “Uıqydaǵy arý” baletterinen kúrdeli ıirimderdi ımenbeı oryndap, súıispenshilikke bólendi. Qudaıǵa shúkir, mundaı álemdik esimder qatarynda qazaqtyń da talantty ul men qyzdary jeterlik. Sonyń biri de biregeıi, búginde Sıýrıh opera jáne balet teatrynda óner kórsetip júrgen Álııa Tanyqpaeva men K.Baıseıitova atyndaǵy ulttyq opera jáne balet teatrynyń ártisi Serjan Káýikovtiń A.Adannyń “Korsar” baletinen keltirgen bir úzik kórinisi úzdik órilip, kókeıden ketpesteı órnek qaldyrdy. Astana aspany qııaldyń qylquıryǵymen jelpigendeı ásem sazben tolqyp turdy.
Qarashash TOQSANBAI.
* * *
ShABYTTY QYZDYRǴAN “DEJAVIý”
Aty álemge máshhúr opera juldyzy Dmıtrıı Hvorostovskııdiń sazger Igor Krýtoımen birlesip qoıǵan konsertin ónersúıer qaýym “Qazaqstan” ortalyq konsert zalynan tamashalady.
Hvorostovskıı men Krýtoıdyń bul jolǵy usynǵan “Dejavıý” jobasynda san alýan shyǵarmashylyq stıl men túrli janrdaǵy 24 kompozısııa oryndaldy. Adamnyń jan dúnıesin tebirenter konsertte Vıktor Popovtyń Hor óneri akademııasynyń akademııalyq hory jáne Konstantın Orbelıannyń basqarýyndaǵy kameralyq orkestri de óz ónerlerin ortaǵa saldy.
Araı ÚIRENIShBEKQYZY.