Qumǵa bókken Qulynjon qoryǵynan bastalatyn Samar aýdanynyń aýmaǵy Ertisti jaǵalaı baryp, parom ótkelimen bitedi. Bas-aıaǵy 106 shaqyrymǵa sozylǵan qumdy jaǵalaý jazdyń kúni sýǵa túsip, tynyǵýǵa taptyrmas oryn. Toǵyz joldyń torabynda jatqan aýdan ormanǵa da baı. Teńizdeı tolqyǵan egistigi kóz arbaıdy. Aýdannyń túkpirindegi «Odessa» paromy syndy sý joly elimizdiń basqa óńirlerinde bar ma eken deseńizshi.
Samar aýdanynyń ákimi Serik Jeńisuly ótkizgen baspasóz máslıhatynda tilshiler keler jyly «Odessa» paromynyń qatynap-qatynamaýy týraly suraq qoıdy. Bilýimizshe, birneshe jyldan beri kólik tasymalymen aınalysyp kele jatqan parom ıesi kásibiniń tıimsizdigin alǵa tartyp, keler jyly sý kóligin toqtatýǵa bel býǵan. Ol toqtasa, týrızm salasy toqyraıdy. Olaı deıtinimiz, parom minip, sýdan ótý úshin sonaý Aqtaý, Atyraýdan aǵylyp jatqan saıahatshylar bar. Sondyqtan da Samar aýdanynyń basshysy kásipkerdi qoldaý maqsatynda sýbsıdııa máselesi qarastyrylyp jatqanyn aıtty. Bıyldyń ózinde Sarybel jaǵalaýyna shamamen 50 myń týrıst kelip, tabıǵatyn tamashalaǵan. Qazirde jaǵajaı aýmaqtaryn abattandyrý, ınfraqurylymdy damytý, jańa demalys nysandaryn salý jumystary júrgizilip jatyr.
– Samar aýdanynyń «Týrızm jáne ınvestısııalar ortalyǵy» KMM qurylyp, Sarybel aýylynda zamanaýı qonaqúı salý jóninde halyqaralyq «Pana Asia» kompanııasymen memorandýmǵa qol qoıyldy. Sondaı-aq Buqtyrma sýqoımasynyń jaǵasynda serýen aımaǵyn salý jobasy daıyndalyp jatyr, – deıdi aýdan ákimi S.Jeńisuly.
Samar jeke aýdan bolyp qurylǵaly týrızmnen bólek, áleýmettik salada da serpilis baıqalady. Aýdan ortalyǵyndaǵy kópqabatty turǵyn úıler jóndelip, jas mamandarǵa, qat mamandarǵa úlestirilip jatyr. Jas maman demekshi, aýdanǵa bıyl 20 jas muǵalim keldi. Demek kadr tapshylyǵy da birte-birte joıylyp keledi. Olarǵa eń qajettisi – baspana. Samar aýyly ortalyqtandyrylǵan jylý júıesine kóshýi de ábden múmkin. Aýdan basshylyǵynyń aıtýynsha, keler jyly jylý qazandyǵynyń qurylysy bastalady.
Aýdanda halyqty qoldaý, jańa jumys oryndaryn ashý jumystary kún tártibinen túspeıdi. Keıingi 9 aıda 298 adam jumyspen qamtylsa, 12 turǵyn óz kásibin ashýǵa 18,9 mln teńge kóleminde grant aldy. 61 otbasy ataýly áleýmettik kómek alyp otyr.
Samarda serpilis bar. О́ndiris kólemi 1,4 mlrd teńgeni qurasa, qurylys jumysynyń kólemi 5,4 mlrd teńgege deıin ulǵaıǵan. Tartylyp jatqan ınvestısııa da artqan.
– Jumys jan-jaqty júrgizilip jatyr. Aýdannyń týrıstik áleýeti qandaı bolsa, aýyl sharýashylyǵy salasy da sondaı qarqynmen damyp keledi. Aýdanda sýarmaly jerlerdi ulǵaıtý maqsatynda júıeli jumys iske asty. Bıyl 500 ga jer aınalymǵa engizilse, aldaǵy ýaqytta taǵy 582 gektardy iske qosý josparlanyp otyr. Aýyl sharýashylyǵy taýar óndirýshilerine 347,5 mln teńge sýbsıdııa, 572 mln teńge kóleminde nesıe berildi, – deıdi aýdan ákimi.
Baspasóz máslıhatynda ákim aýdannyń erteńgi josparyna da toqtalyp ótti. Aıtýynsha, qummen kómkerilip jatqan jaǵalaýǵa teńdesi joq arbat salynady. Tipti áýejaıǵa dep te oryn belgilenip jatyr. Káriz júıesin jańartý, jol jóndeý sekildi jumys kúndelikti, qalypty júrgizile beredi.
Shyǵys Qazaqstan oblysy,
Samar aýdany