Qazaqstanda turǵyn úı tólemderin alatyn kúsh qurylymdary qyzmetkerlerinen ótinim qabyldaý bastalady. Olar úshin birden eki baǵdarlama iske qosylady: «Naýryz Áskerı» – jańa turǵyn úı satyp alýǵa, «Áskerı baspana» – ekinshi deńgeıli naryqtan úı alýǵa arnalǵan, dep habarlaıdy Egemen.kz.
17 qarashadan bastap «Otbasy bank» turǵyn úı tólemderin alýshylardan nesıe ótinimderin qabyldaýdy bastaıdy. Olardyń qatarynda Qorǵanys mınıstrligi, UQK, IIM, TJM, Memlekettik kúzet qyzmeti, áskerı prokýratýra jáne basqa da vedomstvolardyń qyzmetkerleri men áskerı qyzmetshileri bar.
Bank málimetinshe, bólimshelerge óz betinshe barýdyń qajeti joq. Nesıe berý vedomstvolardyń ózderi jasaqtaıtyn tizimder boıynsha júrgiziledi. Qazirgi ýaqytta «Otbasy bank» tıisti hattardy joldaǵan.
Tizimder jasaqtalǵannan keıin turǵyn úı tólemderin alýshylar bank bólimshelerine júginip, menedjer tizimde bar-joǵyn tekserip, nesıe ótinimin qabyldaıdy.
Jańa turǵyn úı satyp alǵysy keletinder úshin «Naýryz Áskerı» baǵyty qarastyrylǵan. Nesıe mólsherlemesi – 9 paıyz. Baǵdarlamaǵa bastapqy jarnasyz da qatysýǵa bolady.
Eger bastapqy jarna 0–20 paıyz aralyǵynda bolsa, nesıe somasynyń shegi:
Astana men Almaty úshin – 36 mıllıon teńge; Basqa óńirler úshin – 30 mıllıon teńge.Al bastapqy jarna 20–50 paıyz aralyǵynda bolsa, bank nesıe somasyn 80 mıllıon teńgege deıin arttyrýdy josparlap otyr.
«Naýryz Áskerı» – «Naýryz» baǵdarlamasynyń bir bóligi. Qarjy naryqtyq sharttarmen áleýmettik oblıgasııalar shyǵarý arqyly tartylady, al memleket sońǵy mólsherlemeni sýbsıdııalaıdy. Jańa turǵyn úıdi tańdaý, brondaý jáne satyp alý Baspana Market portalynda (otbasybank.kz) júzege asyrylady.
Ekinshi deńgeıli turǵyn úı satyp alǵysy keletinder úshin «Áskerı baspana» baǵdarlamasy qoljetimdi. Munda nesıe mólsherlemesi – 18 paıyz, bastapqy jarna – 20–50 paıyz, al nesıe somasynyń shegi – 50 mıllıon teńge. Úıdi baǵdarlama qatysýshysy ózi tańdaıdy.