ASTANA. 24 maýsym. Qyzylorda oblysynyń ákimi Qyrymbek Kósherbaevtyń ókimimen Qarmaqshy aýdanynyń ákimi Nájmádın Shamuratov qyzmetinen bosatylyp, Qazaly aýdanynyń ákimi laýazymyna taǵaıyndaldy. Bul týraly oblys ákimdiginiń baspasóz qyzmeti habarlady.
Qazaly aýdanynyń tizginin ustaǵan jańa ákim buǵan deıin Qarmaqshy aýdanynyń basshylyq qyzmetin atqarǵan.
Shamuratov Nájmádın Shákızadauly 1963 jyly Ońtústik Qazaqstan oblysy Shymkent qalasynda dúnıege kelgen. 1986 jyly Jambyl gıdromelıoratıvtik-qurylys ınstıtýtyn - ınjener-gıdrotehnık, Ál-Farabı atyndaǵy Qazaq Ulttyq ýnıversıtetin - zańger, Almaty qalasyndaǵy «Qaınar» ýnıversıtetin - ekonomıst mamandyǵy boıynsha bitirgen.
Eńbek jolyn 1980 jyly Qazaly aýdanyndaǵy № 64 jyljymaly mehanıkalandyrylǵan kolonnada jumysshy retinde bastaǵan. 2002-2005 jyldary Qazaly aýdany ákiminiń orynbasary, Qazaly aýdanynyń ákimi, 2005-2011 jyldary oblystyq memlekettik sáýlet-qurylys baqylaýy basqarmasyn, oblystyq qurylys basqarmasyn jáne oblystyq sáýlet jáne qala qurylysy basqarmasyn basqarǵan. 2011-2013 jyldary Qyzylorda oblysy boıynsha memlekettik sáýlet-qurylys baqylaý jáne lısenzııalaý departamentiniń dırektory, oblystyq qurylys basqarmasynyń basshysy laýazymdarynda qyzmet atqarǵan. 2013 jyldan osy kezge deıin Qarmaqshy aýdanynyń ákimi qyzmetin abroıly atqaryp keldi.
Talǵat Raıymbek.
Derek, sýret: oblys ákimdiginiń baspasóz qyzmeti.