ASTANA QURDASTARYNA ELBASY TILEGI

Aqordada Memleket basshysy Nursultan Nazarbaev “Elordanyń on eki biregeı ǵımaraty Astana qur­dastary úshin” atty jemisti júzege asyrylǵan baǵdarlamanyń aıasynda qalanyń eń ásem ǵımarattaryn aralap kórgen elorda qurdastary – balalarmen kezdesti, dep habarlady Qazaqstan Respýblıkasy Prezı­denti­niń baspasóz qyzmeti. Mundaı eń tanymal ǵımarat­tar­dyń qataryna “Qazaqstan” or­talyq kınokonsert zaly, Tuńǵysh Prezıdenttiń Intellektýaldyq mektebi, “Báıterek” kesheni, Nazarbaev ýnıversıteti, “Astana Arena” jabyq stadıony, “Qazaq eli” monýmenti, Táýelsizdik saraıy, Beıbitshilik jáne kelisim saraıy, “Shabyt” shyǵarmashylyq saraıy, sondaı-aq “Dýman” jáne “Kerýen” oıyn-saýyq keshenderi jatady. Sol kúni balalar Qazaqstan Res­pýblıkasy Prezıdentiniń rezıden­sııasynda bolyp, Aqorda­daǵy zaldardy aralap kórdi. – Qazirgi ýaqytta Astanada balalarǵa arnalǵan Tuńǵysh Prezıdenttiń Intellektýaldyq mektebi ashyldy. Ony bitirgennen keıin oqýdy jańa halyqaralyq ýnıversıtette – Nazarbaev ýnıversıtetinde jalǵastyrýǵa bolady. Ondaǵy bilim deńgeıi álemniń úzdik joǵary oqý oryndarynan kem túspeıdi, – dep atap ótti Memleket basshysy oqýshylarmen áńgimelesý kezinde. Prezıdent dene shynyqtyrýmen jáne sportpen aınalysýdyń mańyzdylyǵyn atap ótti. – Biz sender baqytty jáne bilimdi azamat bolyp shyǵýlaryń úshin bárin jasaımyz, – dep atap kórsetti Nursultan Nazarbaev. Prezıdent oqýshylarǵa tereń bilim meńgerip, keleshekte Otanymyzdyń laıyqty azamaty bolý úshin alǵa umtylýlaryń qajet degen ıgi tilegin bildirdi.