Astana qalasyndaǵy Ulttyq mýzeıde Estonııa Ulttyq mýzeıimen birlesip uıymdastyrylǵan «Qolmen órilgen qolǵap syry» atty kórme ashyldy. Kórme Estonııanyń ulttyq mádenıetiniń mańyzdy bóligi sanalatyn qolǵap toqý dástúrine arnalǵan.
Saltanatty is-sharaǵa Estonııa Prezıdenti Alar Karıs pen onyń jubaıy Sıre Karıs, Mádenıet jáne aqparat mınıstri Aıda Balaeva, eston delegasııasy, dıplomatııalyq korpýs pen eki eldiń zııaly qaýym ókilderi qatysty. S. Karıs quttyqtaý sózinde uıymdastyrýshylarǵa alǵys bildirdi.
«Soltústik halyqtary úshin qolǵap – turmystyq ómirde eń qajet dúnıe. Bul nárseni Qazaqstanǵa qatysty aıtýǵa da bolady dep oılaımyn. Eston Ulttyq mýzeıiniń kóshpeli kórmesinde eston halqynyń tarıhy men mádenıeti kórsetiledi. Bizdiń órnekterimiz, sımvoldar, halqymyz, ana nemese áje beınesi usynylǵan. Iá, mádenıetimizdiń mańyzdy bóligi áıelder arqyly berildi. Olar – otbasy men oshaǵyn, halyq danalyǵyn, salt-dástúrdi, ádet-ǵurypty jáne mádenıetti saqtaǵan jandar. Mádenıetimiz, rýhymyz árdaıym osy áıelderdiń aıaly alaqanynda boldy. Biz ony joǵary baǵalaımyz ári qurmetteımiz. Osy kórmeni meılinshe kóp adam tamashalasa degen tilek bar. Sebebi bir-birimizdiń mádenıetimiz ben ómirge degen kózqarasymyzǵa qyzyǵýshylyq tanytý arqyly biz danalyqqa jáne adamgershilikke bir taban jaqyndaımyz», dedi Estonııa Respýblıkasynyń Prezıdenti.
Is-shara barysynda Aıda Balaeva birlesken kórme mádenı yntymaqtastyqty nyǵaıtýǵa, qolóner, mýzeı isi salasynda jańa birlesken jobalarǵa jol ashatynyna senim bildirdi.
«Qazaqstan úshin Estonııanyń mádenı murasymen tanysý erekshe mańyzdy. Osyndaı kórmeler ulttyq biregeıliktiń jańa qyrlaryn ashyp, shyǵarmashylyq dıalogqa múmkindik beredi. «Qolmen órilgen qolǵap syry» atty kórmeniń ataýy tereń maǵynaǵa toly. Ol tek qolóner men sheberlikti emes, eki el halqyna tán jyly da senimdi qarym-qatynasty bildiredi. Qol men qolǵaptyń birin-biri tolyqtyrǵany sııaqty, bizdiń mádenıetter de óz bolmysyn saqtaı otyryp, dástúrdi qorǵaý men ony zamanaýı turǵydan damytý jolyndaǵy ortaq umtylysta úılesim tabady», dedi mınıstr.
Ekspozısııada Orta ǵasyrlardaǵy úlgilerden bastap, búgingi zamanaýı buıymdar kóshirmeleri qoıylǵan. Ondaǵy árbir órnek pen qoldanylǵan tús óz dáýiri men aımaqtyq erekshelikterinen syr shertedi. Kórme 2025 jylǵy 28 jeltoqsanǵa deıin jalǵasady.