Aqordada Memleket basshysy Nursultan Nazarbaev Reseı Federasııasynyń Prezıdenti Dmıtrıı Medvedevpen kezdesti, dep habarlady Qazaqstan Respýblıkasy Prezıdentiniń baspasóz qyzmeti.
Kezdesý barysynda memleket basshylary Qazaqstan-Reseı saýda-ekonomıkalyq jáne mádenı-gýmanıtarlyq yntymaqtastyǵyn odan ári damytý perspektıvasyn talqylady.
Nursultan Nazarbaev reseılik áriptesine Qazaqstannyń elordasy – Astana kúnine baılanysty saltanatqa tikeleı qatysýǵa kelgendigi úshin rızashylyǵyn bildirdi. Qazaqstanda Elorda kúnine baılanysty qazaqstandyqtardyń qýanyshyn ózderimen birge eń senimdi jáne shynaıy dostary atap ótetinin baǵalaıdy.
– Eki el arasyndaǵy qarym-qatynas syndarly damýda. Qazaqstanda Reseıdiń kómegimen jobalyq jalpy quny 700 mıllıon dollardy quraıtyn Ekibastuz GRES-2-ni qaıta qurylymdaý josparlanýda. Atom energetıkasyndaǵy yntymaqtastyq ta damýda, Qazaqstanda reseılik tehnologııa boıynsha birlesken kásiporyn qurý, sondaı-aq AES qurylysy josparlanǵan, – dedi Nursultan Nazarbaev.
Taraptar sondaı-aq bıylǵy jyly kúzde ótetin Qazaqstan men Reseı shekaralyq yntymaqtastyǵynyń dástúrli Forýmy aıasyndaǵy aldaǵy kezdesýlerge ázirlik barysyn talqylady.
Kezdesýdiń qorytyndysy boıynsha “Ekibastuz GRES-2-niń №3 energııa blogyn ornata otyryp, keńeıtý jáne qaıta qurylymdaý” jobasyn qarjylandyrý úshin nesıelik kelisimge qol qoıyldy.
* * *
Aqordada elimizdiń Prezıdenti Nursultan Nazarbaev Belarýs Respýblıkasynyń Prezıdenti Aleksandr Lýkashenkomen kezdesý ótkizdi, dep habarlady Qazaqstan Respýblıkasy Prezıdentiniń baspasóz qyzmeti.
Kezdesý barysynda eki memlekettiń basshylary eki jaqty saýda-ekonomıkalyq yntymaqtastyqtyń keń aýqymdy máselelerin talqylady. Nursultan Nazarbaev atap ótkendeı, Belarýs Qazaqstan úshin mańyzdy áriptestiń biri bolyp tabylady.
Nursultan Nazarbaev Qazaqstan men Belarýs arasyndaǵy ózara tıimdi ekonomıkalyq yntymaqtastyqtyń jaqsaratynyna, sondaı-aq birlesken ındýstrııalyq jobalardyń tabysty júzege asatynyna senim bildirdi.
* * *
Aqordada elimizdiń Prezıdenti Nursultan Nazarbaev Iordanııa Koroli Abdalla ıbn Hýseınmen kezdesti, dep habarlady Qazaqstan Respýblıkasy Prezıdentiniń baspasóz qyzmeti.
Kezdesý barysynda memleket basshylary eki jaqty qarym-qatynastardy damytýdyń jaı-kúıi men perspektıvasyn, sondaı-aq birlesken ekonomıkalyq ózara is-qımyldy talqylady.
* * *
Aqordada Memleket basshysy Nursultan Nazarbaev ótpeli kezeńdegi Qyrǵyz Respýblıkasynyń Prezıdenti Roza Otýnbaevamen kezdesti, dep habarlady Qazaqstan Respýblıkasy Prezıdentiniń baspasóz qyzmeti.
Memleket basshysy R.Otýnbaevany ótpeli kezeńdegi Qyrǵyz Respýblıkasynyń Prezıdenti qyzmetine saılanýymen jáne eldiń jańa Konstıtýsııasynyń qabyldanýymen quttyqtady.
Eki eldiń Prezıdentteri qos memleket arasyndaǵy eki jaqty qarym-qatynastardy damytý máselelerin talqylady.
Nursultan Nazarbaev ótpeli kezeńdegi Qyrǵyz Respýblıkasynyń Prezıdentine jańa qyzmetinde tabystar, al baýyrlas qyrǵyz halqyna tynyshtyq, turaqtylyq pen órkendilik tiledi.