Áskerge shaqyrýdyń kezekti naýqany aıasynda IIM Ulttyq ulany merzimdi áskerı qyzmetshilerdi daıarlaý boıynsha mańyzdy qadam jasap otyr. Endi jaýyngerlik daıyndyq baǵdarlamasyna jańa oqý baǵyty – ushqyshsyz ushý apparattarynyń (UUA) operatorlaryn oqytý engizildi. Bul shaqyrylýshylarǵa zamanaýı áskerı-qoldanbaly daǵdylardy meńgerip, suranysqa ıe mamandyqty ıgerýge múmkindik beredi, dep habarlaıdy Egemen.kz Ulttyq ulannyń baspasóz qyzmetine silteme jasap.
Ishki ister mınıstriniń orynbasary – Ulttyq ulannyń Bas qolbasshysy general-maıor Ańsaǵan Baltabekov elordadaǵy 5573 áskerı bóliminde jańartylǵan UUA operatorlaryn daıarlaý synybymen tanysyp, onyń múmkindikterine joǵary baǵa berdi.
Zamanaýı oqý synyby merzimdi áskerı qyzmetshilerdi oqytýǵa tolyq beıimdelgen. Munda sarbazdar drondardyń qurylymyn, basqarý erejelerin, tehnıkalyq qyzmet kórsetý tártibin jáne taktıkalyq qoldaný elementterin meńgeredi. Kýrs jaýyngerlik esepti daıyndaýǵa baǵyttalǵan, onyń quramyna esep komandıri, FPV-dron operatory, oq-dári jónindegi maman jáne barlaý operatory kiredi.
Oqytý júıesi aldymen árbir áskerı qyzmetshige óziniń mamandyq baǵyty boıynsha jeke daıyndyqtan ótýge, keıin shynaıy jaǵdaıǵa barynsha jaqyn toptyq jattyǵýlarǵa qatysýǵa múmkindik beredi.
«Qazirgi ýaqytta UUA operatorlaryn daıarlaý sapalyq jańa deńgeıge kóterilip jatyr. Munda praktıkalyq oqytýǵa tolyq jaǵdaı jasalǵan. Bizge dál osyndaı júıeli tásil qajet», dedi general-maıor Ańsaǵan Baltabekov.
Áskerı bólimdegi jumys barysyn baǵamdaı otyryp, Bas qolbasshy aldaǵy mindetterdi aıqyndady: materıaldyq-tehnıkalyq bazany odan ári damytý, jeke jóndeý sheberhanasyn qurý, biryńǵaı oqý baǵdarlamasyn ázirleý jáne jyl boıy oqý prosesin júrgizýge arnalǵan oqý qalashyǵyn jobalaý.
Bul oqý synybyn úlgi retinde alyp, dron operatorlary bólimsheleri qurylatyn basqa áskerı bólimderde de osyndaı ortalyqtar ashý usynyldy.
Osyndaı oqý ortasynyń qurylýy IIM Ulttyq ulanynyń jaýyngerlik áleýetin arttyrýǵa jáne áskerı qyzmetshilerdi zamanaýı baǵyttar boıynsha daıarlaýdy damytýǵa mańyzdy serpin beredi.