Jetisý oblysy sheteldik ınvestısııa tartý arqyly óńirdiń ónerkásiptik áleýetin kúsheıtýdi jalǵastyryp jatyr. Máselen, Taldyqorǵan qalasyndaǵy ındýstrııalyq aımaqta chılılik «ME Elecmetal» kompanııasy tegistegish bolat shar shyǵaratyn iri zaýyt salýdy josparlap otyr. Jańa kásiporynnyń irgetasy keler jyldyń naýryz aıynda qalanyp, 2028 jyly iske qosylady.
Investısııa óńir ekonomıkasynyń jańa draıveri ekeni belgili. Bul joba aıasynda shamamen 70 mln AQSh dollary kóleminde ınvestısııa tartylyp, qýaty jylyna 180 myń tonnaǵa deıin ónim óndiretin óndiris orny ashylady. Nátıjesinde, óńirde 150 jańa turaqty jumys orny qurylady. Oblys ákiminiń orynbasary Áset Qanaǵatovtyń aıtýynsha, atalǵan joba – óńir úshin strategııalyq mańyzy bar bastamalardyń biri.
«Jetisý oblysynda birqatar iri ınvestısııalyq jobalar júzege asyrylyp keledi. Negizgi qujattarǵa qol qoıylyp, birneshe kezdesý ótkizilgennen keıin óz tarapymyzdan bolashaq zaýytty ornalastyrý úshin «Taldyqorǵan» ındýstrııalyq aımaǵynan jer telimin daıyndadyq. Oblys basshylyǵy atynan qoldanystaǵy zańnama aıasynda ınvestjobaǵa barynsha qoldaý kórsetiletinin aıtqym keledi. Bul joba óńir ekonomıkasyna mýltıplıkatıvti áser berip qana qoımaı, turaqty jumys oryndarynyń ashylýyna yqpal etedi», dedi Á.Qanaǵatov.
«ME Elecmetal» kompanııasynyń bas dırektory Eýhenıo Arteaga atap ótkendeı, Jetisý oblysy strategııalyq turǵydan qolaıly geografııalyq jerde ornalasqan, qajetti logıstıka men energetıka salasyndaǵy resýrstarǵa baı, bul daıyn ónimdi tabysty júzege asyrýǵa múmkindik beredi.
«Bizdiń joba metallýrgııa salasyn damytýǵa baǵyttalǵan. О́nim ishki naryqta da, Ortalyq Azııa elderine de eksportqa jiberiletin bolady. Barlyq uıymdastyrý máselesi sheshilgennen keıin keler jyldyń naýryz aıynda bolashaq zaýyttyń irgetasyn qalaýdy josparlap otyrmyz», deıdi kompanııa dırektory.
Kompanııa ókiliniń aıtýynsha, jobany júzege asyrý kezinde zamanaýı ekologııalyq standarttar saqtalady. Iаǵnı óndiristik qaldyqtardy azaıtýǵa ári energııany únemdi paıdalanýǵa erekshe nazar aýdarylady.
Jalpy, óńirde ǵana emes, el kóleminde tegistegish bolat sharǵa suranys jyl saıyn artyp otyr. Bul ónim negizinen taý-ken óndirisinde kendi untaqtaý kezinde qoldanylady. Qazaqstandaǵy mys, altyn jáne ózge de paıdaly qazbalardy óndirýshi iri kompanııalar osyndaı ónimniń basty tutynýshysy bolyp sanalady. Sala mamany, metallýrgııa ınjeneri Bekjan Sársenovtiń aıtýynsha, bul zaýyt óńir ekonomıkasy úshin úlken serpilis ákelýge tıis.
«Qazir elimizde bolat shardyń basym bóligi shetelden ákelinedi. Jetisýdaǵy zaýyt iske qosylsa, ımportqa táýeldilik aıtarlyqtaı azaıady. Bul – ekonomıkalyq qana emes, strategııalyq turǵydan da mańyzdy qadam», deıdi ol.
Taldyqorǵandaǵy jańa zaýyttyń ashylýy – óńir turǵyndary úshin de qýanyshty jańalyq. Jergilikti jas mamandar metallýrgııa salasyndaǵy jańa tehnologııalardy ıgerý múmkindigine ıe bolady. Sonymen qatar óndiris orny qosalqy qyzmetterdi qajet etetindikten, kólik-logıstıka, energetıka, servıs salalaryna da janama áseri tıedi.
Jetisý oblysy