Arqa jurtynyń maqtanyshy, belgili dástúrli ánshi, ónertanýshy Erlan Tóleýtaı halyqaralyq deńgeıdegi qos birdeı joǵary marapatqa ıe boldy. Irlandııanyń Dýblın qalasynda ótken XIII Silk Road International Film Festival qorytyndysynda rejısser Elzat Eskendirdiń «Ábil» fılminde basty róldi somdaǵan Erlan Tóleýtaı «Úzdik akter» júldesin ıelengen, dep habarlaıdy Egemen.kz.
Mınıstrlik Erlan Tóleýtaıǵa jáne fılmniń shyǵarmashylyq tobyna ulttyq kınematografııany damytýǵa, qazaqstandyq ónerdi shetelde nasıhattaýǵa qosqan úlesi úshin shynaıy alǵys bildirdi.
«Bul otandyq kınematografııa úshin qýanyshty ári mańyzdy jańalyq. Atalǵan marapat qazaqstandyq kınoǵa degen qyzyǵýshylyqtyń artyp kele jatqanyn jáne otandyq akterlerdiń kásibı deńgeıiniń joǵary ekenin kórsetedi. «Ábil» fılmi de, basty róldi somdaǵan akter de Qazaqstan kınosynyń álemdik mádenı keńistikte laıyqty deńgeıde tanyla alatynyn taǵy bir márte dáleldedi», delingen Mádenıet jáne aqparat mınıstrliginiń habarlamasynda.
Buǵan deıin «Ábil» fılmi Fransııadaǵy 31-shi Vesoul halyqaralyq Azııa kınofestıvalinde úsh birdeı júldeni – Jury Grand Prize, Critical Jury Prize jáne NETPAC Jury Prize – jeńip alǵan bolatyn. Al, Erlan Tóleýtaıdyń osyǵan deıin de, Qyrǵyzstan astanasynda ótken III Bishkek halyqaralyq kınofestıvalinde Elzat Eskendirdiń «Ábil» fılmindegi basty róli úshin «Eń úzdik akter» júldesin ıelengen edi.
Qazylar alqasynyń quramynda Fransııa, Italııa, Germanııa, Nıderlandy jáne Bangladesh elderinen kelgen kıno mamandary boldy.
«Ssenarııge saı keıipkerińizge tańdaıtyn akter bolmys-bitimi, ishki energııasymen jaqyn bolýy kerek. Kásibı bolý-bolmaýy mańyzdy emes. Eń bastysy – energııa. Men 2015 jyly ssenarıı jazylǵan kezde shyn ómirdegi «Ábildi» izdedim. Sol energııalyq tutastyqty Erlan Tóleýtaıdan kórdim. Sebebi ol – dalalyq sıpat, tabıǵı reńin joǵaltpaǵan adam», degen bolatyn rejısser.
Kınotýyndy 1990 jyldardaǵy qazaq aýylyndaǵy áleýmettik-ekonomıkalyq qıyndyqtardy, mal-múliktiń jappaı bóliske túsýin, qoǵamdaǵy ádiletsizdik pen jemqorlyqtyń kúsheıýin, áleýmettik teńsizdik pen rýhanı daǵdarysty shynaıy kórsetedi.
Qaraǵandy oblysy