Qyzylordada óńir turǵyndaryn suıytylǵan gazben qamtamasyz etý máselesi talqylanǵan májilis ótti. Jaýapty sala basshylary qatysqan jıynda oblys ákimi Nurlybek Nálibaev kásipkerler tómendetilgen baǵamen alyp otyrǵan áleýmettik gaz tek halyqqa satylýy kerektigin tapsyrdy.
– Osyǵan deıin suıytylǵan gazdy arzan baǵamen satyp alǵannyń arqasynda paıdaǵa kenelgenderińizdi bilemiz. Biraq bulaı jalǵastyra berýge bolmaıdy, byltyr da qatań eskerttim – áleýmettik gazdy tek halyqqa satý kerek. Al kommersııalyq gazdy óz qarajattaryńyzǵa alyńyzdar. Tipti turǵyndardy tolyq qamtamasyz etý úshin qymbat bolsa da, basqa kózderden kommersııalyq gazdy jedel jetkizip, halyqqa áleýmettik baǵamen satyńyzdar. Osy saladaǵy kásipkerler aımaqqa bólingen gazdy ónerkásip nysandaryna, basqa óńirlerge satyp, tapshylyqty qoldan jasap otyr. Taǵy da aıtamyn – arzan gaz áýeli osy óńir turǵyndarynyń qajettiligin tolyǵymen óteýge jumsalýy kerek. Sol turǵyda tıisti sharalar qabyldańyzdar, – dedi oblys basshysy.
Búginde oblystaǵy 16 operator 144 avtogaz quıý stansasy, 6 gaz saqtaý qoımasy arqyly suıytylǵan gaz satýmen aınalysady. О́ńirde arzanǵa alyp, qymbatqa saýdalaıtyn alypsatarlyq áreketterge jol bermeý maqsatynda oblys shekarasyna kezekshilik ornatyldy. Zańdy túrde tirkelmeı, avtokólikterge suıytylǵan gaz qondyrǵylaryn ornatý faktilerin anyqtaıtyn reıdtik tekserýler júrgizilip, tıisti sharalar qabyldana bastady.
Oblystyq polısııa departamenti aımaqqa bólingen gazdyń basqa óńirlerge shyqpaýyn qadaǵalaý úshin táýlik boıy jumys isteıtin baqylaý beketterin «Qarabutaq – Qyzylorda – Shymkent» avtojolynyń Aral aýdanyndaǵy 1363-903-shaqyrymyna, osy kúrejoldyń Jańaqorǵandaǵy 1998-268-shaqyrymyna, «Qyzylorda – Jezqazǵan» jolynyń 12-shaqyrymyna ornalastyrdy.
Janar-jaǵarmaı men gaz tapshylyǵyn boldyrmaý maqsatynda jergilikti atqarýshy organ, ekonomıkalyq tergep-tekserý, memlekettik kirister jáne básekelestikti qorǵaý departamentteri ókilderinen qurylǵan óńirlik shtab jumys isteıdi. Qazirgi esep boıynsha oblysta suıytylǵan munaı-gazynyń qory shamamen 892,1 tonna.