Atyraý oblysynda ınternetke qosylǵan eldi mekender sany 146-ǵa jetti. Al 5G tehnologııasymen ınternetke qoljetimdilikti qamtamasyz etetin 133 bazalyq stansııa jumys istep tur, dep habarlaıdy Egemen.kz.
Oblystyq sıfrlandyrý jáne arhıvter basqarmasynyń bas mamany Raýan Rysqalıevtiń aıtýynsha, byltyr ınternet 132 eldi mekende ǵana bolǵan.
«Bıyl memlekettik basqarýdy sıfrlandyrý jáne IT-jobalardy damytý aıasynda «Jusan Mobile» AQ-men birge shalǵaıdaǵy eldi mekenderdi joǵary jyldamdyqty ınternetpen qamtý qolǵa alyndy. Osy maqsatta «OneWeb» spýtnıktik tehnologııasy engizildi. Bıyl Isataı, Qurmanǵazy, Inder, Qyzylqoǵa, Jylyoı jáne Mahambet aýdanyndaǵy 14 aýyl spýtnıktik ınternetke qosyldy», deıdi Raýan Rysqalıev.
Onyń deregine qaraǵanda, oblysta 5G tehnologııasymen ınternetke qoljetimdilikti qamtamasyz etetin 133 bazalyq stansııa bar. Onyń ishinde 110 stansııa Atyraý qalasynda ornalasqan. Al Jylyoı aýdanynda 20, «Teńiz» vahtalyq kentinde 3 stansııa ornatylǵan.
«Jyldamdyǵy joǵary ınternettiń qosylýy aýyl turǵyndaryna bilim berý, medısına salalarynda sapaly qyzmet kórsetýge jol ashty. Qashyqtan jumys isteýge, mádenı is-sharalardy uıymdastyrýǵa, kásipkerlikpen aınalysýǵa múmkindik berdi», dep málim etti Raýan Rysqalıev.