Almatyda 4-klınıkalyq aýrýhana bazasynda kóp aǵzalyq donorlyq úderis ótti. Bul týraly Transplantattaýdy jáne joǵary tehnologııalyq medısınalyq qyzmetterdi úılestirý jónindegi respýblıkalyq ortalyq málim qyldy, dep jazady Egemen.kz.
4 adamnyń ómiri saqtaldy
Donor 1967 jyly týǵan er adam. Oǵan dárigerler mıdyń ólimin belgilegen. Otbasynyń kelisimi arqyly odan júrek, baýyr jáne 2 búırek alyndy:
- júrek 1967 jyly týǵan pasıentke qondyryldy («Kardıologııa jáne IA ǴZI» AQ);
- baýyr 1967 jyly týǵan pasıentke transplantattaldy («A.Syzǵanov atyndaǵy UǴHO»);
- oń búırek – 2006 jyly týǵan resıpıentke («A.Syzǵanov atyndaǵy UǴHO»);
- sol búırek – 1990 jyly týǵan pasıentke («A.Syzǵanov atyndaǵy UǴHO»).
Kún saıyn 1 adam kóz jumady
Sala mınıstrliginiń málimetinshe, el boıynsha kútý paraǵynda 4521 pasıent, onyń ishinde 106 bala tur. 2025 jyldyń alǵashqy 10 aıynda ǵana ólim saldarynan tizimnen 272 adam (kún saıyn 1 adam) shyǵarylǵan.
2025 jyldyń 12 aıynda qaıtys bolǵannan keıingi donorlardan tek 14 donorlyq prosess júrgizildi, onyń barysynda ómirlik mańyzdy aǵzalardy 60 transplantattaý júzege asyrylǵan.
Aǵzalarǵa qajettilik óte joǵary
Transplantattaýdy jáne joǵary tehnologııalyq medısınalyq qyzmetterdi úılestirý jónindegi respýblıkalyq ortalyqtyń dırektory Aıdar Sıtqazınovtiń aıtýynsha, árbir donorlyq jaǵdaı – bul dárigerlerdiń, úılestirýshilerdiń, zerthanalardyń, sanavıasııanyń jáne proseske birneshe mınýt ishinde engiziletin barlyq qyzmetterdiń birlesken zor jumysynyń nátıjesi.
«Biraq bastysy – donor otbasynyń sheshimi. Olardyń batyldyǵynyń arqasynda búginde óz múmkindikterin jyldar boıy kútken adamdar ómir súrip jatyr. Statıstıka kórsetkendeı, Qazaqstanda aǵzalarǵa qajettilik óte joǵary. Myńdaǵan pasıent transplantattaýdy kútýdi jalǵastyryp jatyr jáne biz kún saıyn derlik kómektese alatyn adamdardan aıyrylamyz. Sondyqtan ár qutqarylǵan pasıent – jaı ǵana medısınalyq jeńis emes, qaıta oralǵan adam ómiri», deıdi Aıdar Sıtqazınov.