Túrkistan qalasyndaǵy №32 jalpy orta mektebinde oqýshylardyń oılaý qabileti men logıkalyq daǵdylaryn damytý baǵytynda jańa bastama qolǵa alyndy. Mektepte arnaıy jabdyqtalǵan shahmat kabıneti ashylyp, ár qabattyń foıesine shahmat taqtalary ornatyldy, dep habarlaıdy Egemen.kz.
Shahmat – balanyń kórneki-beıneli oılaýyn damytyp, sheshim qabyldaý, taldaý jáne tabandylyq daǵdylaryn qalyptastyratyn ıntellektýaldy oıyn. Sondyqtan mektepte bul baǵytqa qyzyǵýshylyq artyp otyr. Qazirgi tańda 1–4 synyptan 150 oqýshy, 5–7 synyptan 45 oqýshy turaqty túrde úıirmege qatysady.
Mektep dırektory Aıgúl Abaıqyzy bul bastamanyń mańyzyn atap ótti:
«Shahmat – jaı ǵana oıyn emes, balanyń mı qabiletin shyńdaıtyn kúshti qural. Úıirmege qatysyp júrgen balalardyń sabaqqa yntasy artyp, oılaý jyldamdyǵy, zeıini jaqsarǵanyn baıqap otyrmyz. Ata-analardyń da qyzyǵýshylyǵy joǵary. Olar balasynyń bos ýaqytyn tıimdi ótkizip, ózine senimdi bolǵanyn qalaıdy. Biz úshin ár balanyń jan-jaqty damýy mańyzdy», deıdi mektep dırektory.
Oqýshylardyń shahmatqa degen súıispenshiligin arttyrý maqsatynda jaqynda mektepke halyqaralyq grossmeıster Nurlan Bolatuly Ybraev kelip, jas shahmatshylarǵa sheberlik sabaǵyn ótkizdi. Balalar men ata-analar úshin bul úlken motıvasııa boldy.
Aıta keteıik, elimizde 42 mektepte shahmat pán retinde oqytylady, al 1500-ge jýyq bilim ordasynda úıirmeler jumys isteıdi. 2027 jylǵa deıingi keshendi jospar aıasynda Túrkistan oblysyndaǵy shahmat úıirmeleriniń sany odan ári artady dep josparlanǵan.