Jańa jyl qarsańynda árbir zańsyz kesilgen shyrshaǵa keltirilgen zalal mólsheri 15 AEK bolyp baǵalanady, dep habarlaıdy Egemen.kz.
Eger úıińizdi jańa jylǵa bezendirý maqsatynda ósip turǵan shyrshany kesetin bolsańyz, bul áreket Qazaqstan Respýblıkasynyń Ákimshilik quqyqbuzýshylyq týraly kodeksinde jaýapkershilikke ákeletinin umytpańyz. Mundaı is tabıǵı ortaǵa eleýli zalal keltirý bolyp sanalady. Kesilgen aǵash neǵurlym kóp bolsa, jaýapkershilik te soǵurlym joǵary.
«Orman jáne buta aǵashtaryn zańsyz keskeni, joıǵany nemese zaqymdaǵany úshin Ákimshilik kodekstiń 381-1-baby boıynsha jaýapkershilik kózdelgen. Eger turǵyn jańa jyl aldynda ormanda nemese kóshede shyrsha kesse, oǵan 15 AEK kóleminde aıyppul salynady. Sonymen qatar mindetti túrde kesilgen aǵash, qoldanylǵan quraldar men kólik tárkilenedi jáne keltirilgen zalal tolyq kólemde óteledi», deıdi Pavlodar oblysynyń orman sharýashylyǵy jáne janýarlar dúnıesi jónindegi aýmaqtyq ınspeksııasynyń basshysy Isataı Abdrazahov.
Orman qoryna kirmeıtin aǵashtardy zańsyz kesken úshin:
jeke tulǵalarǵa – 50 AEK;
laýazymdy tulǵalarǵa, jeke kásipkerlerge jáne kommersııalyq emes uıymdarǵa – 150 AEK;
orta kásipkerlik sýbektilerine – 200 AEK;
iri kásipkerlik sýbektilerine – 500 AEK (kesilgen aǵash, kólik jáne quraldardy tárkileýmen qatar).
Orman qory quramyna kiretin aǵashtardy zańsyz kesý úshin:jeke tulǵalarǵa – 100 AEK;
laýazymdy tulǵalarǵa, jeke kásipkerlerge jáne kommersııalyq emes uıymdarǵa – 300 AEK;
orta kásipkerlik sýbektilerine – 400 AEK;
iri kásipkerlik sýbektilerine – 1 000 AEK (mindetti tárkileýmen).
Bul áreketter erekshe qorǵalatyn tabıǵı aýmaqtarda jasalsa nemese bir jyl ishinde qaıtalansa:jeke tulǵalarǵa – 150 AEK;
laýazymdy tulǵalarǵa, jeke kásipkerlerge jáne kommersııalyq emes uıymdarǵa – 450 AEK;
orta bızneske – 600 AEK;
iri bızneske – 1 500 AEK (mindetti tárkileýmen jáne zalaldy tolyq óteýmen qatar).
Zańsyz kesýden keltirilgen zııan 50 AEK-ten asqan jaǵdaıda qylmystyq is qozǵalady. Mundaı kezde aıyppuldan basqa, túzetý sharalary, qoǵamdyq jumys, bostandyqty shekteý nemese aıyrý, sondaı-aq múlikti tárkileý qarastyrylǵan.
Jańa jyl qarsańynda óńirge Reseıden jetkiziletin tabıǵı shyrshalar kóbeıedi. Ekologııalyq ınspektorlar polısııamen birge olardyń zańdylyǵyn únemi tekseredi. Turaqty monıtorıng nátıjesinde ótken jyly Jańa jyl aldynda óńirde zańsyz aǵash kesý faktileri tirkelmegen.