Táýelsizdik kúnine oraı Google kompanııasy eń ozyq jasandy ıntellektiniń biri – Gemini modeliniń qazaq tilindegi nusqasyn iske qosty, dep habarlaıdy Egemen.kz.
Jasandy ıntellekt jáne sıfrlyq damý mınıstrliginiń málimetinshe, jahandyq bastamanyń bir bóligi retinde qazaq tili Gemini 3 býyny aıasynda qosylǵan 23 jańa tildiń qataryna endi. Bul el turǵyndaryna álemniń iri tilderimen teń dárejede, óz ana tilinde Gemini múmkindikterin paıdalanýǵa múmkindik beredi.
«Gemini-diń qazaq tilindegi ınterfeısi qazirdiń ózinde veb-nusqada qoljetimdi. Ol úshin paıdalanýshylar Google akkaýntynyń baptaýlarynda qazaq tilin tańdaýy qajet. Aldaǵy ýaqytta Android jáne iOS júıelerine arnalǵan nusqalardy qoldaý, sondaı-aq Gemini Live servısin iske qosý josparlanyp otyr», delingen habarlamada.
Bul jańalyq Google kompanııasynyń Qazaqstanda jasandy ıntellektini damytýǵa baǵyttalǵan jumysynyń bir bóligi. Kompanııa kadrlardy daıarlaýǵa, sıfrlyq daǵdylardy damytýǵa jáne ázirleýshilerdi qoldaýǵa ınvestısııa salady. Saldarlary memlekettik basqarýdyń tıimdiliginiń artýy jáne eldiń ekonomıkalyq ósimine yqpal etýi múmkin.
Mınıstrlik bul qadamdy sıfrlyq memleketti damytý jáne básekege qabiletti AI-ekojúıe qalyptastyrý jolyndaǵy mańyzdy qadam dep atap ótti. Ári qaraı jasandy ıntellektini damytý, sıfrly ónimderdi lokalızasııalaý jáne jańa mamandardy daıarlaý baǵytynda halyqaralyq seriktestermen yntymaqtastyq jumystary jalǵasady.