Elordanyń eki túrli aýdanynda bir táýliktiń ishinde eki qaıǵyly jaǵdaı oryn aldy. Astana qalalyq Polısııa departamentiniń baspasóz qyzmeti áleýmettik jelilerde taraǵan aqparatty rastap, oqıǵanyń mán-jaıyn túsindirdi, dep habarlaıdy Egemen.kz.
Polısııa málimetinshe, eki oqıǵa da 2025 jyldyń 18 jeltoqsanynda bolǵan. Alǵashqy habarlama «Highvill» elıtalyq turǵyn úı kesheniniń aýmaǵynda er adamnyń máıiti tabylǵany týraly túsken. Tekserý barysynda marqumnyń tulǵasy anyqtaldy. Aldyn ala boljam boıynsha, ol óz-ózine qol jumsaǵan.
Kóp uzamaı qalanyń basqa bóliginde taǵy bir qaıǵyly jaǵdaı tirkeldi. Elordanyń turǵyn úıleriniń birinde áıel adam 18-qabattan qulap ketken. Qazirgi ýaqytta eki derek boıynsha da sotqa deıingi tergeý amaldary bastalyp, oqıǵalardyń sebep-saldary anyqtalyp jatyr.