Bas prokýror Berik Asylovtyń X áleýmettik jelisindegi jazbasyna sáıkes, jyl qorytyndysyna arnalǵan alqa otyrysynda óńirlerdegi balalardyń quqyqtaryn qorǵaý baǵytyndaǵy jumystar talqylandy. Birqatar jobanyń aralyq nátıjeleri aıtylyp, aldaǵy mindetter naqtylandy, dep jazady Egemen.kz.
Otyrysta Batys Qazaqstan oblysynyń prokýratýrasy qylmystyq qaýipterdi anyqtaý jáne azaıtýǵa baǵyttalǵan «Qaýipsiz óńir» jobasyn tanystyrdy. Joba qaýipti ýchaskelerdi abattandyrý, kóshelerdi jaryqtandyrý, ınfraqurylymdy monıtorıngteý, sondaı-aq quqyq buzýshylyqtar týraly derekterdi taldaý arqyly profılaktıkalyq jáne patrýldik jumysty kúsheıtýdi kózdeıdi.
Usynylǵan derekterge sáıkes, joba aıasynda birqatar táýekelder tómendetilip, balalardyń mektepke baratyn joldarynda ınfraqurylymdyq máseleler sheshilgen. Sonymen qatar býllıngke qatysty faktiler anyqtalyp, tıisti sharalar qabyldanǵan.
Atalǵan jumys Memleket basshysy Qasym-Jomart Toqaev balalardyń quqyǵyn qorǵaý men qaýipsiz orta qalyptastyrý memlekettiń basym baǵyty ekenin atap ótken ustanymdarymen sabaqtas ekeni aıtyldy.
Alqa otyrysynyń qorytyndysy boıynsha barlyq óńir prokýrorlaryna balalar qaýipsizdigi máselelerine erekshe nazar aýdarý tapsyryldy. Qaýipti aýmaqtardy anyqtaý, jaryqtandyrý men patrýldeýdi kúsheıtý, jergilikti atqarýshy organdarmen jáne polısııamen ózara is-qımyldy naqtylaý aldaǵy kezeńdegi negizgi mindetter retinde belgilendi.
Sonymen qatar Almaty oblysynyń prokýratýrasy Kundelik platformasymen memorandým jasap, qosymshanyń basty betinde prokýratýra blogyn iske qosqany aıtyldy. Bul blog balalardyń quqyqtyq mádenıetin arttyrýǵa jáne qaýipsizdigin qamtamasyz etýge baǵyttalǵan.
Blog aıasynda foto, vıdeo, mátindik materıaldar men vebınarlar oqýshylardyń jas erekshelikterine saı daıyndalyp, quqyqtyq taqyryptar túsinikti tilde usynylady. Keri baılanys QR-kodtar men messendjerler arqyly anonımdi túrde júzege asady. Resmı málimetke sáıkes, blog materıaldaryn 210 myńǵa jýyq oqýshy men ata-ana kórgen.
Platformamen yntymaqtastyq quqyqtyq aqparat taratýmen qatar, qolda bar derekterdi taldaýǵa múmkindik bergen. Bul málimetter «Baqytty jáne qaýipsiz balalyq shaq» jobasy sheńberinde paıdalanylyp, táýekel tobyndaǵy balalar men ata-analardy erterek anyqtaýǵa jaǵdaı jasaǵan.
Habarlamada atqarylǵan jumystar nátıjesinde 16 myńnan astam balanyń medısınalyq qyzmettermen qamtylǵany, 4 myńnan astam ata-anaǵa zańda kózdelgen áleýmettik tólemder berilgeni aıtyldy. Sondaı-aq qamqorlyqsyz qalǵan úsh jasar balaǵa jedel kómek kórsetilgeni keltirilgen mysaldardyń biri retinde kórsetildi.
Bas prokýratýra málimetinshe, bul atqarylǵan jumystyń bir bóligi ǵana. Aldaǵy ýaqytta balalardyń quqyqtaryn qorǵaý jónindegi prokýrorlar qyzmetin júıeleý jáne aqparattandyrý tıimdiligin arttyrý maqsatynda Kundelik platformasymen osyndaı ıntegrasııany ózge óńirlerde de engizý josparlanyp otyr.