Qamqorlyq aıasy keńeıip keledi

Oblys kóleminde jumyspen qam­týdy úılestirý, aımaq tur­ǵyndarynyń ómir sapasyn arttyrý baǵytynda birqatar jumys qolǵa alynǵan. Aldymen áleýmettik saıasatta adam kapıtalynyń ma­ńyzdylyǵy zor ekendigin aıta ketýge tıispiz. Darqan dalanyń danalyǵyn boıyna sińirgen arydaǵy jurt «Qarty bardyń qazynasy bar» dep tegin aıtpaǵan. Tárbıe tórkini de ómirden kórgeni, túıgeni kóp qarııalardyń kókiregin­de. Jas tolqyn aldyńǵy býyn aǵalar­dyń ǵıbratty ǵumyryn ómirsheń ónege retinde paıdalansa quba-qup. Sol turǵyda eki býyn­nyń arasynda jandy baılanys ornatqan lázim. Búgingi at jalyn tartyp mingen jastar eline eńbegi sińgen ardagerlerdiń mańdaı terin syılap, qurmet kórsetse qoǵamdy izgilendire­tin de osy yqylas. Adamgershilikke negizdel­­gen izgi qasıetter tereńge tamyr jaısyn desek, jastardy qarttardy syılaýǵa, olarǵa jan-jaqty qamqorlyq kórsetýge tárbıeleýdiń mańyzy zor.

О́ńirde jyl saıyn qazan aıynda Qart­tardy qoldaý aılyǵy ótkizilip, aýqymdy sharalar utymdy úılestiriledi. Bıyl aılyq barysynda 2400-den astam is-shara ótkizilip, oǵan ortasha eseppen alǵanda 54 myń adam qatysty. Bir mezettik shara bolsa da qarııalar ózderin elep-eskerip, jandy qamqorlyq kórsetken jastarǵa dán rıza bolyp, bir jadyrap qaldy. Konserttik baǵ­darlamalar men mazmundy kezdesýlerden bastap, medısınalyq tekserýlerdiń áseri mol boldy. Qart adamdarǵa kommýnaldyq-turmystyq máselelerinde áleýmettik qoldaý kórsetildi. Bul maqsatqa jergilikti bıýdjet­ten 910 mıllıon teńge qarajat bólinip, oblys­tyń 35 myń zeınetkerine bir rettik kómek, 1200 adamǵa sanatorıılyq-kýrort­tyq emdelýge jol­dama berildi. Kókshetaý qalasynyń ­31 myń zeınetkeriniń qoǵamdyq kólikte tegin ­júrýi qamtamasyz etilip, 322 turǵynǵa otyn-kómir alýǵa kómek kórsetildi.

– Prezıdent Joldaýynda naqty kórse­tilgenindeı, áleýmettik qoldaý tek bıýdjet esebinen ǵana emes, belsendi, janashyr azamattardyń qatysýymen júzege asqanda ǵana nátıjeli bolady, – deıdi ob­lystyq jumyspen qamtýdy úılestirý men áleýmettik baǵdarlamalar basqarmasynyń basshysy Sholpan Rahmatýllına. – Bul rette kásipkerler men qoǵamdyq uıymdardyń 122 mln teńge kóleminde demeýshilik kómek kórsetýi óńirde áleýmettik jaýapkershilikti túsine biletin adamdar qatary az emestigin aıǵaqtaıdy. Sonyń arqasynda áleýmettik qoldaýmen qamtylǵandar sany jyl saıyn kóbeıip keledi. Áleýmettik saıasattyń basty ustanymy – áleýmettik qoldaýdyń ádildigi men qoljetimdiligi. Búginde 81 myńǵa jýyq azamat memlekettik qoldaýmen qamtylyp otyr. Sonymen qatar 46 áleýmettik mekemede 1300 adam turaqty túrde qoldaý-kómek alady. Oblystaǵy jalǵyz soǵys ardageri Nurǵasym Ájitaev pen 1 216 tyl ardagerine erekshe qamqorlyq kórsetildi.

Oblys kóleminde múgedektigi bar azamattar­dy qoldaý, ómir súrý sapasyn jaqsartý bary­synda naqty qadamdar jasalyp jatyr. О́ńir­de 29 myńnan astam azamat osyndaı sanatqa ­jatady. Olardyń 13 myńyna ońaltý qu­ral­dary men árqıly qyzmetter usynylǵan. Máse­len, «Invataksı» qyzmeti 9 aýdan men qala­da qol­jetimdi, bıyl 32 myń adamǵa tasymal qyz­meti kórsetildi. Múgedekter kúnine oraı ­300 mln teńgeden astam bir jolǵy tólem jasal­dy.

Oblys aýmaǵyndaǵy «Belsendi uzaq ómir súrý» ortalyqtarynyń jumysy ın­klıýzıvti qyzmet kórsetýdiń mańyzdy býy­ny. Bul ortalyqtar qarym-qatynas, sport, shyǵarmashylyq arqyly áleýmettik beıim­delýdiń tıimdi alańyna aınalǵan.

О́ńirde jyl basynan beri 31 myń­nan astam jumys orny ashylyp, jumys­syzdyq deńgeıi 4,5%-ǵa qysqardy. «Kúmis jas», «Jastar prak­tıkasy» syndy baǵ­dar­lamalardyń nátı­jesi aıqyn baıqalyp otyr. Osy baǵdar­lama­lar aıasynda kóp­tegen turǵyn turaq­ty jumys­pen qamty­lyp, jas mamandar qajetti tájirıbe jınaq­taıdy. Munyń ózi kóp-kórim kómek. Memleket tarapynan sýbsıdııalanatyn qoǵam­dyq jumystar 2,4 myń adamnyń jumys­pen qamtylýyna sep boldy.

Memleket basshysynyń tapsyrmasyna sáıkes shaǵyn kásipkerlikke granttar berý jalǵasyp keledi. Bıyl bıznes ıdeıalardy qoldaýǵa 175 grant berilip, kásipkerler 267,8 mln teńge kóleminde qarjylandyryldy. Bul jumys isteımin dep alǵa umtylǵandardyń óz isin bastaýyna múmkindik berip, aldarynan keń jol ashady.

О́ńirde kópbalaly, az qamtylǵan otbasylardy qoldaý formatyn zaman talabyna saı jetildirý turǵysynda da aıta qalarlyqtaı tyń serpilis bar. Jyl basynan beri barlyǵy 1475 otbasyna 709,7 mln teńge kóleminde ­ataýly áleýmettik kómek taǵaıyndaldy. ­Sondaı-aq áleýmettik kelisimshart aıasynda 115 adam turaqty jumysqa ornalasyp, 539 ­kópbalaly otbasy men 2138 bala túrli áleýmet­tik tólemdermen qamtyldy.

Prezıdent Joldaýynda memlekettik qyzmetterdiń ashyqtyǵy, sıfrlandyrý, áleýmettik kómektiń dáldigi basty nazarǵa alynǵan. Aldaǵy jyldyń jospary osy baǵyttardy tolyq qamtyp, ilkimdiliktiń meılinshe nátıjeli bolýyn kózdeıdi. Atap aıtqanda, áleýmettik baǵdarlamalardyń tıimdiligin arttyrý, turaqty jumys oryndaryn ashý, bıznes bastamalardy qoldaý, áleýmettik qyzmetterdi tolyq sıfrlandyrý kún tártibindegi máseleler.

– Bul atalǵan jumys tásilderiniń bar­lyǵy derlik áleýmettik qoldaýdy neǵur­lym maqsatty, ádil etýge múmkindik beredi, – deıdi basqarma basshysy Sh.Rahmatýllına.

Qarttardy qoldaý, ınklıýzıvti qoǵam qa­lyp­tastyrý, kópbalaly otbasylardy demeý, sondaı-aq qolynan is keletin azamattar­dyń kásippen shuǵyldanýyna múmkindik týdyrý áleýmettik saıasattyń ózegi. Osy mindetter naqty oryndalyp, el ishindegi birlik-bereke artsa, kókirekterdegi senim de nyǵaıa túsedi.

Aqmola oblysy