Qorǵanys mınıstrligi áskerge shaqyrý jáne azamattardyń merzimdi áskerı qyzmeti júıesinde sıfrlyq sheshimderdi engizý isin belsendi jalǵastyryp jatyr. Zamanaýı sheshimder medısınalyq tekserýden ótý, azamattardy aqparattandyrý, shaqyrý tizimderin qalyptastyrý jáne qyzmetti uıymdastyrý sııaqty baǵyttardy qamtıdy, dep jazady Egemen.kz.
Áskerge shaqyrý naýqanyn sıfrlandyrý aıasynda «e-Medosmotr» aqparattyq júıesi iske qosyldy. Júıe Astana, Shymkent qalalarynda jáne Qaraǵandy oblysynyń Abaı qalasynda pılottyq rejımde sátti qoldanyldy. Salalyq vedomostvo men densaýlyq saqtaý mınıstrliginiń birlesken jobasy atalǵan prosesti jedeldetip, áskerge shaqyrylatyn azamattardyń deregin naqty ýaqytta alýǵa múmkindik beredi.
«e-Medosmotr» aqparattyq júıesinde áskerge shaqyrylatyn azamattyń sıfrlyq medısınalyq kartasy jasalyp, 100-den astam medısınalyq parametr boıynsha aqparat toptastyrylady. Onda dáriger qorytyndylaryn engizýge, qujattardy elektrondyq sıfrlyq qoltańba (ESQ) jáne QR-kod arqyly bekitýge, qosymsha tekserilýlerge joldama berýge jáne olardyń nátıjelerin elektrondy túrde alýǵa bolady. Júıe zerthanalarmen, medısınalyq qural-jabdyqtarmen jáne memlekettik aqparattyq resýrstarmen qamtylǵan. Qazirgi ýaqytta «e-Medosmotr» Astana, Shymkent qalalary, Jetisý jáne Batys Qazaqstan oblystarynda engizilgen. Aqmola oblysynda júıeni qosý jumystary bastaldy.
Mınıstrlik azamattardy áskerı qyzmet ótkerý tártibimen tanystyrý maqsatynda ARMIA.KZ sıfrlyq servısin iske qosty. Bul servıske jasandy ıntellekt engizilgen. Ol paıdalanýshylardyń suraqtaryna jedel jaýap beredi. ARMIA.KZ-ke Qorǵanys mınıstrliginiń jalpy sıfrlyq júıesi kiriktirilgen.
Memlekettik keńesshi áskerı-patrıottyq tárbıe jónindegi jumysty kúsheıtýdi tapsyrdy
Áskerge shaqyrý jumysy úshin «Smart voenkomat» júıesi de engizildi. Jasandy ıntellekt tehnologııasyna negizdelgen bul júıe áskerge shaqyrylatyn azamattardyń tizimin avtomatty túrde jasap, medısınalyq tekserýden ótýge baılanysty habarlamalar jiberedi. Tizim jasalǵan kezde azamattardyń jasy, antropometrııalyq derekteri, densaýlyq jaǵdaıy, bilim deńgeıi, júrgizýshi kýáliginiń bar-joǵy jáne shaqyrýdan soń keıinge qaldyrý nemese bosatylý aqparaty qamtylady.
Sıfrlyq tásilder merzimdi áskerı qyzmet barysynda da qoldanylady. Áýe qorǵanysy kúshteriniń 78460 áskerı bóliminde júzege asyrylyp jatqan Sarbaz+ pılottyq jobasy jaýyngerlik jáne arnaıy daıyndyqtyń jańarǵan tujyrymdamasyn, zamanaýı turmystyq jáne oqý ınfraqurylymyn, áskerı qyzmetshilerdiń fıtnes-brasletter arqyly medısınalyq monıtorıngin jáne qyzmet kezinde IT, telekommýnıkasııa jáne drondardy basqarý salasyndaǵy azamattyq mamandyqtardy alý múmkindigin qamtıdy.