28 maýsym – buqaralyq aqparat quraldary qyzmetkerleriniń kásibı merekesi qarsańynda Premer-Mınıstrdiń orynbasary Berdibek Saparbaev aqparat jáne baılanys salasy qyzmetkerlerin tól merekelerimen quttyqtap, nagrada ıelerine arnaıy tósbelgi tabys etti.
Saltanatty merekelik shara barysynda Berdibek Máshbekuly: «Sizder bılik pen halyqtyń arasyndaǵy kópir bolyp eseptelesizder. Qarapaıym halyq sizder arqyly ózderiniń sheshilmeı jatqan máselelerin bılikke jetkizip, sheshedi. Sizder ekonomıkamyzdyń damýyna úlken úles qosasyzdar. О́ıtkeni, qazirgi damý zamanynda eń qymbat, eń kerek nárse – málimet. Sizder memleketke, onyń ishinde Úkimetke tez, jyldam kerekti málimetterdi beresizder. Sol sizder bergen málimetterdi taldaý men zertteýdiń nátıjesinde bizder ózimizdiń josparlarymyzǵa ózgerister engizip, elimizdiń ekonomıkasynyń damýyna úles qosamyz», – dedi B.Saparbaev.
Úkimet basshysynyń orynbasary óz sózinde elimizde «Aqparattyq Qazaqstan-2020» baǵdarlamasy júzege asyrylyp jatqanyn atap ótti. Onyń sózine qaraǵanda, osy baǵdarlamanyń arqasynda elimizdegi aqparattyq júıe jaqsy damyp keledi. «Birikken Ulttar Uıymynyń reıtıngine sáıkes, Qazaqstandaǵy baılanys salasyndaǵy aqparattyń damýy aldyńǵy qatarda. Onyń ishinde ǵalamtordyń, uıaly baılanystyń baǵasy jyldan jylǵa tómendeı túsýde. Qazirgi tańda Qazaqstan uıaly baılanys tarıfi boıynsha álemde 17-shi, al ǵalamtor boıynsha 8-shi orynda», – dedi ol.
Sondaı-aq, shara barysynda Investısııalar jáne damý mınıstri Áset Isekeshev atalǵan sala qyzmetkerlerin «Aqparat salasynyń úzdigi» tósbelgisimen marapattap, atalǵan sala mamandaryn aldaǵy ýaqytta da el abyroıyn asqaqtata berýge shaqyrdy. Sharaǵa belgili qoǵam qaıratkerleri, Májilis depýtattary jáne BAQ ókilderi qatysty. Shara sońy shaǵyn merekelik konsertke ulasty.
Raýshan TÁÝIRHANQYZY,
jýrnalıst.