Álemdegi tehnologııa salasyndaǵy eń iri is-shara CES halyqaralyq tutynýshylyq elektronıka kórmesi bıyl Las-Vegasta ótip jatyr. Kórmeniń basty taqyryby – «Barshaǵa arnalǵan jasandy ıntellekt» dep atalady, dep habarlaıdy Egemen.kz.
Bıylǵy kórmeniń aldyńǵylardan basty aıyrmashylyǵy – jasandy ıntellekt endi jaı ǵana algorıtm emes. Qazir «aqyldy oı» barlyq qurylǵyǵa engizilgen. Jalpy aýmaǵy 250 myń sharshy metrdi, ıaǵnı shamamen 300 mektep sportzalyn quraıtyn kórme alańynda ázirleýshiler, top-menedjerler men ınvestorlar jobalardyń bolashaǵyn jáne yqtımal seriktestikterdi baǵalaýǵa múmkindik beretin baılanystar ornatyp jatyr. Investorlar munda qaı kompanııalarǵa qarjy salý kerektigin túsiný úshin keledi.
Sala sarapshylarynyń aıtýynsha, robototehnıka, avtonomdy basqarý jáne jasandy ıntellektini kommersııalandyrý – CES 2026-nyń negizgi trendteri. Mysaly, Wedbush Securities kompanııasynyń aǵa qor naryǵy sarapshysy Den Aıvstiń aıtýynsha, 2026 jyl jasandy ıntellektini monetızasııalaý jyly bolady.
CES kórmesindegi eń áserli eksponattardyń biri – qytaılyq UniX AI kompanııasy jasaǵan Vanda esimdi gýmanoıd robot. Ol ydys jýý, tósek salý, kir jýý, shaı demdeý jáne sýsyndar daıyndaý sııaqty turmystyq tapsyrmalardyń keń aýqymyn oryndaı alady. Ázirleýshilerdiń aıtýynsha, aı saıyn klıentterge júzden astam osyndaı robot jetkiziledi. Bul tehnologııanyń jaı ǵana demonstrasııadan naqty naryqqa kóshkenin kórsetedi. UniX AI kompanııasynyń túpki maqsaty – jappaı úı naryǵy, alaıda ázirge qonaqúılerdi aralyq kezeń retinde qarastyryp otyr. Sebebi jeke úılerdiń josparlanýy men jabdyqtalýy ártúrli, al qonaqúılerde jaǵdaıdy standarttaýǵa bolady.
24 kz-tiń jazýynsha, UniX AI kompanııasynyń negizin qalaýshy ári bas dırektory Fred Iаng atap ótkendeı, Vanda qonaqúı bıznesinde óziniń tıimdiligin dáleldedi. Onyń aıtýynsha, qonaqúılerde robot bólme jınaý jáne qyzmet kórsetý qyzmetkerleriniń ádette atqaratyn jumysynyń 50 paıyzynan bastap úshten eki bóligine deıin óz moınyna ala alady.
CES kórmesindegi taǵy bir baǵyt – kıber-úı janýarlary. Bul shaǵyn robottardyń moıyn tusynda bet-álpetti beıneleıtin ekran bar, ol emosııany ımıtasııalap, kózben baılanys ornatýǵa múmkindik beredi. Jasaýshylar mundaı qurylǵylardyń áleýmettik mańyzyn atap ótedi: kóptegen adamdar allergııaǵa nemese ómir saltyna baılanysty úı janýaryn asyraı almaıdy, sondyqtan kıber-pıtomester turmystyq shekteýsiz emosıonaldyq serik retinde qarastyrylady.
Chıp óndirý alyby Nvidia avtonomdy júrgizýdiń pılottyq júıesin tanystyrdy. Ol Mercedes-Benz kólikterinde synaqtan ótip jatyr. Baǵdarlama júrgizýshisiz kólikterdi oqytý úshin ashyq II modelderin, derekter jıyntyqtaryn jáne sımýlıasııa quraldaryn biriktiredi. Bul júıe avtomobılderge jol jaǵdaılaryn taldap, naqty ýaqyt rejıminde sheshim qabyldaýǵa múmkindik beredi. Nvidia kompanııasynyń bas dırektory Djensen Hýangtyń aıtýynsha, jańa avtopılot júıesi bar kólikter aldymen osy jyldyń birinshi toqsanynda AQSh-ta satylymǵa shyǵady, keıin Eýropa men Azııa naryqtaryna jol tartady.
Halyqaralyq kórmege qatysty
Den Aıvstyń aıtýynsha, Nvidia avtonomdy júrgizý salasynda Tesla men Alphabet qoldaýyndaǵy Waymo kompanııalarymen qatar negizgi oıynshylardyń birine aınalatynyn ashyq kórsetti. Kompanııa júrgizýshisiz kólikterdegi II-revolıýsııanyń negizi bolatyn chıpterdi jetkizedi. Nvidia – Tesla-nyń seriktesi.
Osylaısha, CES-2026 tehnologııalar jarysynan bolashaq naryqtardy baqylaý úshin kúreske kóshýdi aıqyn kórsetip otyr. Nvidia usynǵan sheshimderge qaraǵanda, kompanııa tek komponent jetkizýshi emes, aldaǵy jyldary adam men mashına arasyndaǵy ózara áreket erejelerin aıqyndaıtyn negizgi júıelik oıynshy bolýdy kózdeıdi.
CES-2026 kórmesi tehnologııalyq serpilisterdi ǵana emes, sonymen qatar jasandy ıntellekt áleminde ashyqtyqtyń jańa standarttaryna degen qajettiliktiń artyp kele jatqanyn kórsetip otyr. Eger buryn negizgi nazar esepteý qýaty men ınfraqurylymǵa aýdarylsa, búginde tehnologııalar kúndelikti ómirge jyldam engen saıyn senim, túsindirmelilik jáne neırojelilerdiń qaýipsizdigi basty máselelerge aınalyp otyr.
Qazaqstan dúnıejúzilik EXPO 2025 Osaka kórmesinde birinshi oryndy ıelendi