Energetıka mınıstrligi 2025 jylǵy jeltoqsan aıynda Kaspıı qubyr konsorsıýmynyń (KQK) teńiz termınaly arqyly munaı jóneltý kóleminiń tómendeýine qatysty túsinikteme berdi, dep habarlaıdy Egemen.kz.
Energetıka mınıstrligi jeltoqsan aıynda KQK teńiz termınaly arqyly munaı jóneltý kóleminiń ýaqytsha tómendegenin rastady.
«Bul jaǵdaı ushqyshsyz ushý apparattarynyń shabýyly saldarynan qashyqtaǵy aılaq qurylǵysynyń (VPÝ-3) jumysyn májbúrli túrde toqtatýmen, sondaı-aq Qara teńiz akvatorııasyndaǵy qolaısyz meteorologııalyq jaǵdaılaryna (daýyldar) baılanysty boldy. Atalǵan faktorlardyń salaǵa áserin barynsha azaıtý jáne munaı óndirýdiń toqtap qalýyna jol bermeý maqsatynda eksporttyq aǵyndardy qaıta bólý boıynsha jumys júrgizildi. Munaı kóleminiń bir bóligi balamaly baǵyttarǵa qaıta baǵdarlandy. Atap aıtqanda, Atyraý-Samara baǵyty boıynsha tasymal kóleminiń artqany jáne Qytaı Halyq Respýblıkasyna jetkizilimderdiń ulǵaıǵany tirkeldi», dep habarlady mınıstrliktiń baspasóz qyzmeti.
Vedomstvo málimetinshe, qalǵan eksporttyq baǵyttar boıynsha tasymaldaý ortasha josparly kórsetkishter deńgeıinde saqtalǵan.
Qazaqstandyq munaı teńizge nege jete almaı jatyr?
Eske salaıyq, búgin «QazMunaıGaz» kompanııasynyń baspasóz qyzmeti Kaspıı qubyr konsorsıýmynyń termınalyna munaı tıeý úshin baǵyt alǵan MATILDA kemesiniń ushqyshsyz apparattardyń shabýylyna ushyraǵanyn habarlady.
Mınıstrlik derekterine sáıkes, KQK-ǵa jasalǵan shabýyldar saldarynan munaı óndirý kólemi 480 myń tonnaǵa azaıǵan.
Aıta keteıik, 29 qarashada Astana ýaqytymen 06:06-da Novorossıısk porty aýdanynda KQK-nyń teńiz ınfraqurylym nysandaryna ekıpajsyz júzý quraldary arqyly shabýyl jasalǵan edi. Nátıjesinde teńizdegi qashyqtaǵy aılaq qondyrǵysy VPÝ-2 (qalqymaly tıeý qurylǵysy) aıtarlyqtaı zaqymdaldy. Ermek Kósherbaev KTK-ǵa jasalǵan shabýyldy Ýkraına tarapymen talqylady. Energetıka mınıstri Erlan Aqkenjenov KTK-ǵa tolyqqandy balama joq ekenin, al ózge baǵyttar tek júktiń belgili bir bóligin ǵana tasymaldaı alatynyn aıtqan edi. Sonymen qatar Májilis depýtaty Aıdos Sarym áleýmettik jelilerde Kaspıı qubyr konsorsıýmynyń termınalyna jasalǵan shabýyldy qoldaǵan azamattardy jaýapqa tartýdy talap etti.