Prezıdent Qasym-Jomart Toqaev jarııalaǵan «Sıfrlandyrý jáne jasandy ıntellekt jyly» aıasynda Syrtqy ister mınıstrligi IýNESKO-nyń О́ńirlik bıýrosymen birlesip, jasandy ıntellektini paıdalanýǵa ulttyq daıyndyqty baǵalaý jobasyn resmı túrde iske qosty.
IýNESKO-nyń atalǵan jobasy jasandy ıntellektiniń ulttyq ekojúıesine jan-jaqty taldaý júrgizýge baǵyttalǵan. Baǵalaý elimizdegi JI damýynyń negizgi ólshemderin, onyń ishinde quqyqtyq jáne normatıvtik-quqyqtyq bazany, sondaı-aq áleýmettik jáne gýmanıtarlyq, ekonomıkalyq, ǵylymı-bilim jáne tehnologııalyq aspektilerdi qamtıdy.
Joba sheńberinde jasandy ıntellekt salasynda teńgerimdi ári ınklıýzıvti saıasat qalyptastyrýdyń sheshýshi sharty retinde tıimdi sektoraralyq jáne vedomstvoaralyq ózara is-qımyldy qamtamasyz etýge erekshe basymdyq berilip otyr.
Búginde IýNESKO-nyń ulttyq daıyndyqty baǵalaý ádisnamasyn (Readiness Assessment Methodology, RAM) iske asyrý boıynsha múddeli taraptardyń Ulttyq jumys toby (National Stakeholder Team) quryldy. Onyń quramyna elimizdiń Jasandy ıntellekt jáne sıfrlyq damý, Ǵylym jáne joǵary bilim, Mádenıet jáne aqparat, Qarjy, Eńbek jáne halyqty áleýmettik qorǵaý mınıstrlikteri, Ulttyq ǵylym akademııasy, «Atameken» UKP, Astana IT University, Ozim Academy, Qazaqstandaǵy jasandy ıntellektini damytý qaýymdastyǵy, «Technowomen» ÚEU, IýNESKO-nyń О́ńirlik bıýrosy, QR IýNESKO jáne ISESKO isteri jónindegi Ulttyq komıssııasy, sondaı-aq jobany iske asyrýǵa tikeleı tartylatyn azamattyq qoǵam uıymdarynyń ókilderi kirdi.
Zertteý qorytyndylary boıynsha elimizde adamǵa baǵdarlanǵan jasandy ıntellekt ekojúıesin qalyptastyrýǵa baǵyttalǵan praktıkalyq usynymdar ázirlenedi.
IýNESKO-nyń osy jobasyn iske asyrý halyqaralyq yntymaqtastyqqa jáne adamnyń ámbebap qundylyqtaryn, quqyqtary men bostandyqtaryn saqtaýǵa negizdelgen memleketimizdiń jasandy ıntellektini damytý jónindegi strategııalyq baǵytyn júzege asyrýdaǵy mańyzdy qadam sanalady.