Qytaıdyń Iýnnan provınsııasyndaǵy shalǵaı aýylda turatyn Van Fýman esimdi oqýshy «qorytyndy emtıhanǵa qalaıda úlgeremin» dep aıazdy kúni 5 shaqyrym joldy jaıaý júrip ótken. Mektepke kelgende onyń shashy men qasy muz bolyp qatyp, al beti sýyqtan qyp-qyzyl bolyp ketipti. Muǵalimi onyń osy sátin sýretke túsirip, jelige júktep jiberedi. Aıtpaqshy, qaısar oqýshy sol emtıhanda 100 baldyń 99-yn jınaǵan.
Kelesi kúni álgi sýret áleýmettik jelide jappaı taralyp, kóp uzamaı sheteldik BAQ-tyń da nazaryn aýdardy. Qysqa ýaqytta-aq Van Fýman «muz bala» atanyp, onyń bir sáttik beınesi tabandylyq pen bilimge degen shynaıy umtylystyń rámizine aınaldy. Kópshilik onyń aıazdy kúni mektepke jetkenine ǵana emes, emtıhandy joǵary nátıjemen tapsyrǵanyna da tánti boldy. Áleýmettik jeli qoldanýshylary oqýshynyń ahýalyna beıjaı qaramaı, qarjylaı kómek jınaı bastady. Nátıjesinde, balanyń mektebine qoldaý kórsetilip, osyndaı qıyn jaǵdaıda oqyp júrgen basqa balalarǵa kómek berý máselesi kóterildi. Van Fýmannyń taǵdyry arqyly aýyldaǵy bilim berý, teń múmkindik jaıy keńinen talqylana bastady.
Osy oqıǵa Rımdegi «Tiken alyp otyrǵan bala» músinin eriksiz eske salady. Ol músin jolyndaǵy qaýlaǵan tikenekke qaramastan márege birinshi bolyp jetken kishkentaı jelaıaqqa arnalǵan. Balaqaı tabanyndaǵy qan qaqsatqan jaraqatqa qyńq etpegen. Onyń erik-jigerine tánti bolǵandar qaısarlyq pen tózimdiligin qurmettep, osyndaı eskertkish ornatypty.