Taldyqorǵan qalasy keıingi jyldary qarqyndy damý jolyna tústi. Aldaǵy jyldary qosymsha 3 shaǵyn aýdannyń irgesi qalanady. Jańa mektepter men medısına mekemeleri ashylady. Qala ekonomıkasynda turaqty ósim saqtalǵan. Máselen, ótken jyly bul kórsetkish 107%-dy qurady.
Byltyr oblys ákimi Beıbit Isabaev Taldyqorǵan qalasynyń jyldyq bıýdjeti 30%-ǵa kóbeıetinin málimdedi. Soǵan saı aldaǵy úsh jylda oblys ortalyǵynda qurylys jumystary qarqyndy túrde júredi. Aıtalyq, búginde jaqsy jaǵdaıdaǵy joldardyń úlesi 91%-ǵa jetti. Bul salaǵa qalalyq bıýdjetten 13,5 mlrd teńge baǵyttaldy. О́tken jyly 28,3 shaqyrym jańa jol salyndy.
Odan bólek, qala turǵyndarynyń ótinishimen, qoǵamdyq kólik qozǵalysy jaqsartyldy. Gaýhar Ana kóshesindegi qozǵalys birjaqtydan ekijaqtyǵa ózgertilip, №27 «Yntymaq – Ortalyq» avtobýs baǵyty iske qosyldy. Qala aýmaǵynda №28, №29 jańa avtobýs baǵyttary ashyldy.
«Taldyqorǵanda úsh birdeı jańa shaǵyn aýdan boı kóterip, Qaratal ózeniniń oń jaǵalaýynda turǵyn úı qurylysy bastaldy. Bul aýmaq aldaǵy jyldary zamanaýı turǵyn úılermen qatar, áleýmettik, medısınalyq nysandar shoǵyrlanǵan jańa qala keńistigine aınalady. Jalpy, 2027 jyldan bastap ózenniń oń jaǵalaýyn keshendi damytý kózdelip otyr», deıdi qala basshysy Ernat Bázil.
О́tken jyly oblys ortalyǵynda birneshe óndiris orny iske qosyldy. Gazbeton, keramıka, elektr jabdyqtaryn shyǵaratyn kásiporyndar men kondıterlik ónim daıyndaıtyn seh ashylyp, akkýmýlıator zaýytynda jańa óndiristik jeli paıdalanýǵa berildi.
«Biz telekommýnıkasııa, aýrýhanalar, jel elektr stansalary men iri kásiporyndarǵa arnalǵan batareıa qurylǵylaryn shyǵaramyz. О́ndiris tolyq jańǵyrtylyp, sıfrlandyrý júıesi engizildi», deıdi zaýyttyń óndiristik dırektory Talǵat Qonaqbaev.
Turǵyn úı qurylysy da qarqyn alǵan. Qalada 200-ge jýyq turǵyn úı salynyp, jańa turǵyn alaptar paıda boldy. Uzaq jyl boıy qaraýsyz qalǵan áskerı qalashyqtaǵy áleýmettik máseleler kezeń-kezeńimen sheshilip jatyr. «Ulan» shaǵyn aýdanyndaǵy 20 úıdiń qasbeti jańartylyp, balkondary aýystyryldy, aýladaǵy oıyn alańdary zaman talabyna saı jabdyqtaldy.
Infraqurylymdy jańartý da basty nazarda. Byltyr júzden astam kóshege asfalt tóselip, «Jastar-3» atty jańa shaǵyn aýdan boı kóterdi. Qala ákimi Ernat Bázildiń aıtýynsha, barlyǵy 790 turǵyn úı salý josparlanǵan.
«Byltyr 56 úıdi paıdalanýǵa berdik. Bıyl 206 úıdi tolyq aıaqtap, «Otbasy bankke» ótkizýge daıynbyz. Sondaı-aq 9-shaǵyn aýdanda eki iri úıdiń qurylysy júrip jatyr», dedi qala ákimi.
Aldaǵy jyldary «Batys», «Qulager» shaǵyn aýdandarynda mektepter salynyp, jańa turǵyn úı alaptarynyń negizi qalanbaqshy. Qazirdiń ózinde 11, 12, 13-shaǵyn aýdandarda ınjenerlik-ınfraqurylym jelileri tartylyp jatyr. Sonymen qatar respýblıkalyq bıýdjet esebinen órt sóndirý deposy, iri qazandyq, turǵyn úıler salý josparlanǵan.
Qalanyń ekonomıkalyq kórsetkishteri de oń nátıje kórsetip otyr. 2025 jyly jalpy ekonomıkalyq ósim 107%-dy qurady. О́nerkásip óniminiń kólemi 174,4 mlrd teńgege jetse, aýyl sharýashylyǵynyń jalpy ónimi 39,4 mlrd teńgeni qurap, ósim 103,3% deńgeıinde qalyptasty. Qurylys salasynda da ilgerileý bar. 2024 jyly 1283 turǵyn jańa baspanamen qamtylsa, ótken jyly 1400-den astam otbasy qonys toıyn toılady. «Yntymaq» turǵyn úı alabyndaǵy 200 páterli bes kópqabatty úıdiń qurylysy bıyl aıaqtalady.
«Áleýmettik salalar da nazardan tys qalǵan joq. Bıyl 300 oryndyq jańa «Bilim-ınnovasııa» lıseıi paıdalanýǵa beriledi. Eski ǵımarattyń tozýyna baılanysty daryndy oqýshylarǵa arnalǵan zamanaýı lıseı salý – ýaqyt talaby. Sonymen qatar «Qulager», «Batys» turǵyn aýdandarynda 1200 oryndyq mektepterdiń qurylysy bastalady. Búginde qala mektepterinde 37 myńnan astam oqýshy bilim alsa, onyń 4 myńǵa jýyǵy – birinshi synyp oqýshylary», deıdi qala basshysy.
Densaýlyq saqtaý salasynda da aýqymdy jobalar qolǵa alynǵan. «Ońtústik-Batys» aýdanynda aýysymyna 500 kelýshige arnalǵan jańa emhananyń qurylysy bastaldy. Qaratal ózeniniń oń jaǵalaýynda 150 oryndyq múmkindigi shekteýli jandarǵa arnalǵan ońaltý ortalyǵy salynyp jatyr. О́tenaı aýylynda kúnine 100 pasıent qabyldaıtyn úsh qabatty zamanaýı ambýlatorııa paıdalanýǵa berildi.
Qala ákimi atap ótkendeı, júzege asyrylyp jatqan jobalar men bastamalar turǵyndardyń ómir súrý sapasyn arttyrýǵa baǵyttalǵan. Qurylys, óndiris, bilim men medısına salalaryndaǵy júıeli jumys – Taldyqorǵannyń shyn máninde túrlenip kele jatqanyn kórsetedi.
Jetisý oblysy